Edicioni i katërt i Festivalit të Librit për Fëmijë mbyll dyert me shifra rekord vizitorësh dhe librash të shitur

Ka përmbyllur me sukses edicionin e tij të katërt Festivali dhe Panairi i Librit për Fëmijë, i cili gjatë katër ditëve të mbajtjes ka tërhequr rreth 20 mijë vizitorë. Ngjarja ka bashkuar në një vend fëmijë, prindër dhe institucione shkollore të ardhura nga pothuajse çdo skaj i Kosovës. Gjatë ditëve të festivalit, numri i madh i pjesëmarrësve u sigurua përmes grupeve të organizuara nga shkolla të ndryshme komunale, si dhe vizitave individuale nën shoqërimin e familjarëve. Organizatorët vlerësojnë se ky angazhim i përbashkët mes mjedisit shkollor dhe atij familjar ka luajtur rol kyç në rritjen e interesimit për blerjen e librave. “Ajo çka është më e mira, duket që bashkëpunimi shkollë me familje ka qenë në këtë rast mjaft i mirë, për shkak se thuajse prindërit u kanë dhënë disa mjete financiare fëmijëve që të paktën një libër ta kenë me vete pas përfundimit të vizitës në festival. Prandaj edhe shtëpitë botuese, komunikimin fillestar e kemi, janë mjaft të kënaqura me shpërndarjen dhe shitjen e librave natyrisht”, u shpreh Agon Ahmeti, drejtor i organizatës “ETEA”. Përveç pranisë së madhe të publikut, këtë vit ngjarja mblodhi rreth 15 shtëpi botuese vendase dhe nga rajoni. Përmes një agjende të pasur me ngjarje kulturore dhe edukative, ky manifestim vijon të mbetet një pikë referimi për kultivimin e pasionit për leximin tek brezat e rinj dhe afrimin e tyre me letërsinë.