Tabaku i kundërpërgjigjet Ramës: Vendi nuk rrezikohet nga prokurorët, por nga kapja e pushtetit prej të korruptuarve

Deputetja e Partisë Demokratike, Jorida Tabaku, ka reaguar përmes një postimi në rrjetin social X, menjëherë pas deklaratave të bëra nga kryeministri Edi Rama nga aeroporti i Rinasit. Në reagimin e saj, ligjvënësja demokrate ka theksuar se problemi kryesor i vendit nuk është sistemi i drejtësisë apo prokurorët, por pandëshkueshmëria e zyrtarëve që abuzojnë me pushtetin. Sipas Tabakut, Shqipëria përballet me një sistem ku individë të korruptuar kanë fituar aq shumë pasuri dhe ndikim, saqë mendojnë se normat juridike vlejnë vetëm për qytetarët e thjeshtë. "Shqipëria nuk vuan nga një 'republikë prokurorësh'; ajo vuan nga një republikë e të korruptuarve që kanë grumbulluar aq shumë pushtet, pasuri dhe arrogancë, sa besojnë se ligji është vetëm për të tjerët dhe se drejtësia duhet të ndalet te dera e tyre", ka shkruar ajo në platformën X.