Nga premtimi për rrënim te legalizimi: Komuna e Mitrovicës së Jugut zyrtarizon mbi 2 mijë metra katrorë ndërtime shtesë të BTP Construction

Pak javë pasi dha zotime publike për asgjësimin e çdo ndërtimi pa leje dhe revokimin e lejeve të paligjshme, administrata komunale ka ndërmarrë një hap krejtësisht tjetër. Më 15 janar 2026, i pari i Mitrovicës së Jugut, Faton Peci, kishte shfaqur një qëndrim të prerë përmes një postimi në rrjetin social Facebook, ku shkruante shkurt: “Objektet e ndërtuara pa leje do të rrënohen”. Megjithatë, disonanca mes retorikës publike dhe veprimeve administrative u shfaq brenda një periudhe të shkurtër prej vetëm dy javësh. Pavarësisht paralajmërimeve për fadroma dhe ndëshkim të shkeljeve urbanistike, realiteti në terren dëshmoi një qasje krejtësisht ndryshe nga institucioni që drejton Peci. Konkretisht, Drejtoria për Planifikim dhe Urbanizëm e kësaj komune, e udhëhequr nga Ardian Kavaja, kishte marrë vendim paraprak për t'i falur dhe legalizuar kompanisë “BTP Construction” një sipërfaqe prej 2,008 metrash katrorë tejkalim, ku përfshihet edhe një penthouse i ngritur në kundërshtim me dispozitat ligjore. Kështu, ndërkohë që deklaratat zyrtare në rrjetet sociale premtonin aksione rrënimi për mbindërtimet dhe shkeljet e lejeve, vendimmarrja zyrtare e komunës ka zyrtarizuar dhe legalizuar metrat katrorë shtesë të ngritur pa lejen fillestare.