Brukseli jep paralajmërimin e prerë: Çdo ndërhyrje në Ligjin e Specializuara rrezikon rrugën evropiane të Kosovës

Komisionerja e BE-së për Zgjerim, Marta Kos, ka riafirmuar qëndrimin e prerë të Bashkimit Evropian se çdo nismë për të ndryshuar Ligjin për Dhomat e Specializuara përbën shkelje të zotimeve të vendit ndaj bllokut. Ajo ka theksuar se veprime të tilla rrezikojnë drejtpërdrejt agjendën integruese të Kosovës. “Do të doja të isha e qartë edhe për faktin se në Kosovë, ndryshimi i ligjit për Dhomat e Specializuara shkon kundër detyrimeve themelore të Kosovës ndaj BE-së. Dhe kjo është e papranueshme. Ndryshimi i rregullave ndërkohë që procedura gjyqësore është në vazhdim sfidon çdo standard ndërkombëtar të sundimit të ligjit. Mesazhi im është shumë i thjeshtë: zgjerimi evropian po ecën përpara. Por nëse vendet kandidate ecin prapa, atëherë vërtet nuk do të jenë në gjendje të bëhen anëtare të BE-së”, u shpreh ajo. Këto deklarata vijnë nga Luksemburgu, ku ministrat e Bashkimit Evropian janë mbledhur për të diskutuar, ndër të tjera, edhe rishikimin e instrumenteve të paraaderimit për shtetet aspirante. Sipas komisioneres Kos, shtetet që synojnë anëtarësimin janë të detyruara të përshtaten plotësisht me qasjen strategjike të BE-së dhe të dëshmojnë përkushtim ndaj vlerave të përbashkëta, ndërkohë që respektimi i shtetit të së drejtës mbetet matësi kryesor i suksesit në këtë proces.