Organizata e Veteranëve të UÇK-së thirrje urgjente qytetarëve: Nesër të gjithë në sheshin e Prishtinës

Organizata e Veteranëve të Luftës së Ushtrisë Çlirimtare të Kosovës (OVL-UÇK) u ka drejtuar një thirrje publike qytetarëve dhe mbështetësve që të marrin pjesë masivisht në tubimin e paralajmëruar për nesër në sheshin kryesor të Prishtinës. Në thirrjen e lëshuar nga kategoritë e dala nga lufta e UÇK-së, theksohet rëndësia e pranisë qytetare që në orët e para të mëngjesit në kryeqytet. "Nesër, mëngjesi duhet të na gjejë të gjithëve në sheshin e Prishtinës. Të bashkuar dhe me dinjitet, për të mbrojtur atë që është e jona dhe për të dëshmuar se UÇK-ja na bashkon", thuhet shprehimisht në njoftimin zyrtar të shpërndarë nga OVL-UÇK në rrjetin social Facebook.