Pacolli pas protestës: Mbrojtja e ish-krerëve në Hagë nuk bëhet përmes kalkulimeve elektorale

Ministrja e Mjedisit, Planifikimit Hapësinor dhe Infrastrukturës, Fitore Pacolli, ka reaguar ashpër pas protestës së zhvilluar sot dhe tensioneve të shënuara në terren. Ajo ka theksuar se ish-krerët e Ushtrisë Çlirimtare të Kosovës që po mbahen në Hagë nuk mund të mbrohen pa praninë e një presidenti dhe përmes lojërave të fushatave zgjedhore, duke e cilësuar këtë si një keqpërdorim të luftës për interesa klanore. "E qysh po ua merr mendja me i mbrojtë ata në Hagë, pa president e në fushatë zgjedhore? Kë po dojnë me e mbrojtë kështu? Se ata në Hagë, jo që nuk po i mbrojnë, por po i keqpërdorin për fushatë. Përpjekja për ta barazuar fatin politik të një partie me fatin historik të UÇK-së është keqpërdorim i luftës për interesa të ngushta partiake. Ne kemi qenë dhe jemi kundër kësaj Gjykate", ka shkruar Pacolli në rrjetet sociale. Në vazhdim të reagimit të saj, zyrtarja e lartë qeveritare ka vlerësuar se rruga e duhur për të dalë në mbrojtje të ish-krerëve të UÇK-së kalon përmes funksionalizimit të plotë të institucioneve të shtetit, duke shtuar se angazhimi i përbashkët duhet të orientohet drejt dëshmisë së pastërtisë dhe drejtësisë së luftës çlirimtare të Kosovës.