Incidenti para Kuvendit, deputeti i Vetëvendosjes tregon momentin kur u ndalua dhunshëm nga protestuesit

Deputeti i Lëvizjes Vetëvendosje, Fahrush Rexhepi, ka ndarë detaje nga ngjarja e tensionuar jashtë ndërtesës së Kuvendit të Kosovës, ku u pengua fizikisht teksa përpiqej të largohej nga objekti legjislativ. Sipas ligjvënësit, ngjarja ka marrë një kthesë të ashpër pas shfaqjes në vendngjarje të organizatorit të protestës, Çlirim Haziri, i cili, sipas pretendimeve të tij, ka orientuar turmën që ta kapnin atë me dhunë. "Nuk e përjetuam mirë. As që e kam prit, me iu thënë të vërtetën. Ajo ndodhi ashtu siç ndodhi, pas një seance të jashtëzakonshme që e patëm sot gjatë tërë ditës," është shprehur Rexhepi, duke reflektuar mbi tronditjen e atij momenti. Duke vijuar rrëfimin e tij, deputeti ka theksuar se kulmi i përshkallëzimit ndodhi pikërisht me ardhjen e Hazirit pranë grupit të protestuesve. "Situata është tensionuar me ardhjen e Çlirim Hazirit, i cili iu ka dhënë urdhër që ata me më kap dhunshëm. U kam thënë: ‘Kthena, mos më prekni, mos më shtyni’, por u pa ajo çfarë ka ndodhur," ka përfunduar deklaratën e tij Rexhepi.