Kriza presidenciale, Faton Peci i drejtohet LDK-së: Bashkëpunimi dhe kompromisi janë domosdoshmëri për vendin

Kryetari i partisë Guxo, Faton Peci, i ka bërë thirrje zyrtare Lidhjes Demokratike të Kosovës (LDK) për reflektim të thellë politik dhe bashkim forcash, me qëllim zhbllokimin e ngërçit aktual institucional. Duke rikujtuar se kanë ngelur edhe 24 orë në dispozicion për zgjedhjen e Presidentit ose Presidentes së re të vendit, Peci ka theksuar se ky proces është jetik për përmbylljen e formimit të institucioneve dhe garantimin e stabilitetit shtetëror. Në mesazhin e tij drejtuar opinionit publik dhe aktorëve politikë, ai ka nënvizuar se interesat e ngushta duhet të mënjanohen përballë sfidave të mëdha që e presin shtetin, përfshirë edhe zhvillimet që ndërlidhen me proceset gjyqësore në Gjykatën Speciale në Hagë. "Për Kosovën ia vlen kompromisi, ia vlen tejkalimi i vetvetes, ia vlen marrëveshja", ka shkruar ndër të tjera Peci, duke shtuar se puna e përbashkët është dëshmia më e mirë e dashurisë për vendin në këto momente delikate.