Përleshje e dhunshme mes të miturve në Gjilan: Dy të lënduar e dy të arrestuar, një i shtruar në QKUK

Një përplasje e rëndë fizike mes dy grupeve të të miturve ka ndodhur të mërkurën në rrugën “Zija Shemsiu” në Gjilan, ku si pasojë dy persona kanë pësuar lëndime trupore. Sipas njoftimit nga Policia e Kosovës, në këtë incident dyshohet se janë përfshirë gjithsej nëntë të mitur, ndërsa gjatë konfliktit janë përdorur edhe mjete të ftohta. Si pasojë e goditjeve, dy prej të pranishmëve kanë pësuar dëmtime trupore. Njëri nga të lënduarit është transferuar në Spitalin Rajonal të Gjilanit, kurse tjetri është dërguar për trajtim më të specializuar në Qendrën Klinike Universitare të Kosovës (QKUK). Lidhur me këtë ngjarje, organet e rendit kanë prangosur dy persona të dyshuar, të cilët me urdhër të prokurorit kujdestar janë dërguar në mbajtje për 24 orë. Autoritetet e hetuesisë e kanë cilësuar rastin si “Vrasje në tentativë” dhe “Pjesëmarrje në rrahje”.