Kryeparlamentarja Haxhiu: Zëri i pacientëve duhet të udhëheqë reformat në shëndetësi

Në kuadër të ditës së dytë të Konferencës së Parë Ndërkombëtare për Cilësinë e Shërbimeve Shëndetësore, krerët e institucioneve, kryetarja e Kuvendit të Kosovës, Albulena Haxhiu, dhe ministri i Shëndetësisë, Arben Vitia, kanë vënë në pah domosdoshmërinë e ngritjes së standardeve mjekësore dhe vendosjes së pacientit në fokus të çdo vendimi. E para e Kuvendit ka bërë të ditur se mirëqenia dhe cilësia në sektorin shëndetësor nuk mund të vlerësohen vetëm përmes raporteve dhe kritereve burokratike, por mbi të gjitha përmes përvojës reale të qytetarëve gjatë trajtimit të tyre në institucionet publike. Ajo ka shpjeguar se pritshmëritë e pacientëve lidhen ngushtë me marrjen e ndihmës në kohë reale, qasjen e kujdesshme nga stafi mjekësor dhe respektimin e integritetit të tyre personal e profesional. “Pacienti dëshiron të dijë nëse do të marrë ndihmën që i nevojitet, në kohën kur i nevojitet, nëse dikush do ta dëgjojë, do t’ia shpjegojë gjendjen dhe do të kujdeset për të me profesionalizëm e me dinjitet”, ka deklaruar Haxhiu. Gjatë fjalës së saj, Haxhiu ka ngritur si shqetësim fenomenin e pabarazisë në qasjen ndaj kujdesit shëndetësor, duke nënvizuar se shërbimet cilësore nuk duhet të kushtëzohen nga vendi i banimit, gjendja financiare apo lidhjet e ngushta personale. Duke u ndalur te pakënaqësitë e qytetarëve, ajo ka kërkuar angazhim më serioz institucional që ato të mos mbeten vetëm shënime në letër, por të shërbejnë si katalizatorë për ndryshime rrënjësore. “Konsideroj që nuk mjafton vetëm që ato të regjistrohen; ato duhet të çojnë në përmirësime konkrete, në mënyrë që pacientët e tjerë të mos përballen me të njëjtat probleme”, ka theksuar ajo. Në anën tjetër, ministri i Shëndetësisë, Arben Vitia, ka vlerësuar se sesionet e ditës së dytë të kësaj ngjarjeje kanë ofruar një platformë të rëndësishme për debate të thelluara, prezantime shkencore dhe shkëmbim të praktikave më të mira rajonale e ndërkombëtare. Ai ka përmendur se fokus i diskutimeve kanë qenë fusha kyçe si siguria e pacientit, auditimet klinike, zbatimi i protokolleve mjekësore, menaxhimi i barnave, inovacionet digjitale dhe perceptimi i vetë pacientëve. Sipas Vitisë, politikat shëndetësore marrin kuptim vetëm atëherë kur materializohen në shërbime konkrete dhe garanci për shëndetin e qytetarëve. “Sistemi informativ shëndetësor, për të cilin tashmë ka filluar puna nga grupet përkatëse, natyrisht se ndihmon shumë në këtë proces, sepse digjitalizimi, ndër të tjera, lehtëson komunikimin, koordinimin, por edhe vendimmarrjen”, ka deklaruar Vitia. Ministri ka shtuar gjithashtu se llogaridhënia, mekanizmat e monitorimit dhe treguesit e qartë të performancës janë shtylla jetike për ngritjen e cilësisë së kujdesit, duke nisur nga qendrat e kujdesit parësor e deri te Qendra Klinike Universitare e Kosovës. Në mbyllje të fjalës së tij, Vitia ka përsëritur se pacienti mbetet busulla e çdo investimi apo reforme në shëndetësi, ndërsa performanca e sistemit duhet të matet përmes shpejtësisë së shërbimit, cilësisë së komunikimit dhe ruajtjes së dinjitetit njerëzor.