Dramë në Kupën e Gjermanisë: Holstein Kiel eliminon Hoffenheimin, dështimi nga penalltitë i kushton Avdullahut

Holstein Kiel ka siguruar një biletë për në fazën e 1/8 së finales së Kupës së Gjermanisë, pasi eliminoi Hoffenheimin pas një serie dramatike të penalltive, e cila u mbyll me rezultatin 4-3. Ndonëse Hoffenheimi arriti të zhbllokonte rezultatin që në pjesën e parë, vendasit e Holstein Kiel u kundërpërgjigjën shpejt. Në minutën e 23-të, Adrian Kapralik vendosi baraspeshën, pas një asisti të saktë nga Hiroki Sekine. Sa i përket lojtarëve shqiptarë, mesfushori i Kosovës, Leon Avdullahu, e nisi ndeshjen si titullar për Hoffenheimin, ndërsa Fisnik Asllani u aktivizua në fushë menjëherë pas fillimit të pjesës së dytë, përkatësisht në minutën e 46-të. Pavarësisht përpjekjeve të dyja skuadrave, rezultati nuk ndryshoi as pas 90 minutave të rregullta dhe as gjatë vazhdimeve, duke bërë që fati i këtij takimi të vendosej nga pika e bardhë e penalltive. Në ekzekutimin e penalltive, Fisnik Asllani tregoi gjakftohtësi duke shënuar, ndërkohë që Leon Avdullahu nuk ia doli të ishte i saktë. Për fat të keq për Hoffenheimin, gabimi i Rots në penalltinë vendimtare bëri që skuadra t'i jepte lamtumirën këtij kompeticioni.