Dramë në Kupën e Gjermanisë: Hoffenheimi i Asllanit dhe Avdullahut eliminohet pas penalltive

Hoffenheimi i ka dhënë lamtumirën Kupës së Gjermanisë pas një ndeshjeje dramatike të vendosur nga pika e bardhë e penalltive. Përballja ndaj Holstein Kielit, skuadër që bën gara në kategorinë e dytë gjermane, nuk prodhoi fitues brenda kohës së rregullt, duke çuar gjithçka drejt ekzekutimeve nga 11-metërshi. Në serinë e penalltive, fati nuk ishte në anën e futbollistëve të përfaqësueses së Kosovës. Ndonëse sulmuesi Fisnik Asllani arriti ta dërgonte topin në rrjetë, mesfushori Leon Avdullahu nuk ia doli të shndërronte në gol penalltinë e tij. Kjo pasaktësi u kushtoi shtrenjtë skuadrës së Hoffenheimit, e cila u mposht me rezultatin 4:3 në serinë e penalltive, duke u eliminuar kështu nga ky kompeticion prestigjioz.