Skandali në KOSTT: Ajrina Gashi-Hamdiu zbardh prapaskenat e kallëzimit penal ndaj ish-kryeshefit Ilir Shala

Ish-anëtarja e Bordit të Drejtorëve të KOSTT-it, Ajrina Gashi-Hamdiu, ka sjellë detaje të reja rreth skandalit që përfshiu ndërmarrjen, duke treguar se bordi kishte vendosur të ndërmerrte hapa ligjorë kundër ish-kryeshefit ekzekutiv, Ilir Shala, pas një incidenti të rëndë të ngacmimit verbal dhe poshtërimit me përmbajtje seksuale ndaj saj. Gjatë një rrëfimi të hapur në emisionin Debat Plus, ajo ka bërë të ditur se sapo ngjarja kishte dalë në dritë, ajo kishte kërkuar me ngulm nga institucioni që çështja të adresohej zyrtarisht nga trupa drejtuese. Si rezultat, në mars të vitit 2021, bordi mori vendimin për të ngritur kallëzim penal ndaj Shalës, megjithëse njëri nga anëtarët kishte shprehur kundërshtimet e tij. Megjithatë, procesi u përball me zvarritje misterioze. Ndonëse praktika e rregullt e ndërmarrjes ishte që vendimet e bordit të merrnin firmën përkatëse brenda dy ditësh, kjo procedurë u la pas dore në rastin konkret. Gashi-Hamdiu ka treguar se mungesa e veprimit iu zbulua rastësisht pas afro tre muajsh e gjysmë, gjatë një mbledhjeje të radhës. Në fund, dokumenti mori firmën e duhur më 19 korrik 2021 dhe menjëherë pas kësaj, sekretarja e ndërmarrjes bëri dërgimin e kallëzimit penal në organet kompetente. “Bordi kishte marrë vendim për ngritjen e kallëzimit penal ndaj Ilir Shalës, por vendimi nuk u nënshkrua menjëherë. Vetëm pas tre muajsh e gjysmë mora vesh se kallëzimi nuk ishte proceduar… Vendimi u nënshkrua më 19 korrik 2021 dhe po atë ditë u dërgua kallëzimi penal, ai kallëzim penal u kam thënë nuk përmban kurgjo hiç”, ka përfunduar rrëfimin e saj Gashi-Hamdiu.