Noah Wyle shpallet mashkulli më seksi për vitin 2026: “Nuk e imagjinoja kurrë se do ta merrja këtë titull”

Revista prestigjioze “People” ka kurorëzuar aktorin 55-vjeçar Noah Wyle si Mashkullin më Seksi të Gjallë për vitin 2026. Ylli i serialit dramatik mjekësor “The Pitt” ka pranuar hapur se ky vlerësim e ka gjetur plotësisht të papërgatitur. “Në fillim mendova se bëhej fjalë për një shaka. Nuk e kisha menduar kurrë në një milion vjet se do të më jepej ky nder,” u shpreh Wyle, duke mos e fshehur mosbesimin e tij fillestar. Megjithatë, ishte bashkëshortja e tij, Sarah, ajo që e bindi se e meritonte plotësisht këtë kurorëzim. Sarah e ka shoqëruar aktorin gjatë sesionit fotografik për revistën, i cili u realizua gushtin e kaluar në një vilë luksoze me pamje nga shkëmbinjtë e Malibusë. Prania e saj, e vajzës së tyre 11-vjeçare dhe e qenit të familjes dëshmoi edhe një herë rëndësinë parësore që ka familja në jetën e tij. Ky titull i rëndësishëm vjen dekada pas famës së tij të parë ndërkombëtare, kur ai u shndërrua në idhull falë rolit të mjekut të ri John Carter në serialin ikonik “Emergency Room” (ER). Në vitet ’90, ai ka qenë pjesë e kopertinës së “People” krah kolegëve të tij George Clooney, Eric La Salle dhe Anthony Edwards, në një botim të posaçëm kushtuar aktorëve më të pashëm të serialit, ndërkohë që vetë Clooney është shpallur dy herë në të kaluarën si njeriu më seksi i vitit. Me suksesin e serialit “The Pitt”, i cili pritet të nisë sezonin e tretë në muajin janar në HBO Max, Wyle po përjeton atë që vetë e cilëson si “fazën e dytë të artë” të karrierës. Performanca e tij e jashtëzakonshme i ka sjellë dy çmime “Emmy” radhazi si Aktori më i Mirë, duke i siguruar një vend të merituar në majat e kinematografisë televizive. Gjatë një bisede me redaktoren e “People”, Charlotte Triggs, aktori ndau gjithashtu reagimet epike të fëmijëve të tij. Djali i tij e priti lajmin me pragmatizëm, duke komentuar me shaka se jeta e të atit do të bëhet më e vështirë, por se kjo erdhi si pasojë e vëmendjes dhe kritikave që sjell fama. Nga ana tjetër, vajza e tij e madhe e ka pasur të vështirë ta besonte këtë zhvillim dhe, sipas aktorit, do të ketë material për ta ngacmuar për pesë dekadat e ardhshme. I pyetur nëse ky vlerësim do t'ia ndryshojë përgjithmonë jetën, Wyle u përgjigj me nota humori: “Shpresoj që çdo gjë të ndryshojë për mirë. Shpresoj që tani e tutje të jetë vetëm verë, trëndafila, qumësht dhe mjaltë”, duke shtuar me të qeshur se miqtë dhe familjarët nuk do t'ia lënë pa ia përmendur shpesh këtë titull të ri.