Mbreti i historisë: Cristiano Ronaldo lë pas Lionel Messin dhe rrëmben çmimin prestigjioz B.O.A.T.

Ylli portugez, Cristiano Ronaldo, është shpallur fitues i çmimit historik B.O.A.T. (Topi i Artë i të gjitha kohërave), një iniciativë e ndërmarrë nga revista prestigjioze franceze "France Football" për të kurorëzuar edicionin më të mirë të “Topit të Artë” ndonjëherë. Ky çmim i jashtëzakonshëm iu dha sulmuesit për triumfin e tij të parë në vitin 2008, ku në fazën finale të votimit ai arriti të mposhtte edicionin e vitit 2012 të argjentinasit Lionel Messi. Statistikat tregojnë një dominim absolut të dyshes Ronaldo-Messi, të cilët mbajnë 12 pozitat e para të kësaj renditjeje historike, të ndjekur më pas nga legjenda braziliane Ronaldo Nazário, falë suksesit të tij në vitin 2002. Ky vlerësim i veçantë u zbulua nga "France Football" gjatë ceremonisë së fundit të “Topit të Artë”, duke sjellë një risi në skenën e futbollit. Për dallim nga tradita ku votojnë vetëm gazetarët, këtë herë fati i fituesit iu la në dorë lexuesve dhe tifozëve anembanë botës. Në këtë garë unike morën pjesë vetëm ata futbollistë që e kanë fituar “Topin e Artë” të paktën dy herë, ndërsa vota nuk jepej për lojtarin në përgjithësi, por për një vit specifik triumfi. Kjo u dha mundësi admiruesve të votonin edicione të ndryshme legjendare të karrierës së yjeve të futbollit. Pjesë e kësaj gare prestigjioze ishin edhe emra të shquar të futbollit botëror si Marco van Basten, Michel Platini, Karl-Heinz Rummenigge, Kevin Keegan, Franz Beckenbauer, Johan Cruyff dhe Alfredo Di Stéfano. Procesi i votimit kishte një kosto simbolike prej një euroje për çdo votë, ndërsa organizatorët kishin parashikuar një dhuratë joshëse për pjesëmarrësit, duke u dhënë mundësinë të bëheshin fitues të dy biletave për të ndjekur nga afër ceremoninë e “Topit të Artë” në vitin 2027. Sipas të dhënave të publikuara nga revista franceze, 5.009 persona vendosën të votojnë më shumë se një herë. Nga ky numër, 44 votues e shfrytëzuan mundësinë nga 10 deri në 26 herë, 300 persona votuan mes pesë dhe nëntë herë, ndërsa 4.665 pjesëmarrës votuan nga dy deri në katër herë.