Berisha nga mbledhja e grupit parlamentar: E pamundur të barazohet opozita me pushtetin e korruptuar

Kryetari i Partisë Demokratike, Sali Berisha, ka zhvilluar ditën e sotme mbledhjen e grupit parlamentar, ku ka shprehur mirënjohjen e tij për deputetët, strukturat e partisë, studentët dhe qytetarët që morën pjesë në protesta. Gjatë fjalës së tij, ai ka dënuar ashpër ndërhyrjen dhe dhunën e përdorur nga ana e efektivëve të policisë ndaj protestuesve. Lideri i opozitës u shpreh prerazi se asnjë prej qytetarëve që u dhunuan nuk kishte qenë i përfshirë në akte dhune. Duke u ndalur tek protestat e muajit qershor, të njohura ndryshe si “Revolucioni Flamingo”, Berisha theksoi se Partia Demokratike vendosi parime të qarta për të ruajtur karakterin qytetar të lëvizjes, duke mos ndërhyrje asnjëherë për t'i marrë drejtimin apo për ta përçarë atë. Më tej, ai solli në vëmendje ndërhyrjet e mundshme të kryeministrit Edi Rama dhe Belinda Ballukut në këto zhvillime, duke pohuar se organizatorët e foltores lejonin hapësirë vetëm për ata individë që përsërisnin sloganin: “Rama në burg, Berisha në burg”. Sipas kreut të demokratëve, narrativa se “të dyja palët janë njëlloj” përbën tezën më antishqiptare dhe antidemokratike që prej muajit qershor e deri më sot, e cila sipas tij shërben vetëm për t'i shpëtuar llogaridhënies qeveritare për korrupsionin dhe abuzimet me paratë e taksapaguesve. “Por, nuk ka mashtrim më të madh, më të turpshëm sesa të shtrosh këtë tezë. Së pari, është forma më e lartë e korrupsionit. Forma më e lartë e korrupsionit është kur fjala apo fjalia shpreh të kundërtën e asaj që është e vërtetë. Dhe kur krahason të pakrahasueshmet. Kjo është në distancë forma më e lartë e korrupsionit të gjuhës, në radhë të parë,” u shpreh Berisha. Ai paralajmëroi se ky barazim artificial mes qeverisë dhe opozitës ka për qëllim shkatërrimin e shpresës së qytetarëve dhe besimit tek procesi i votimit, ndërkohë që rikonfirmoi angazhimin dhe alternativën e Partisë Demokratike në skenën politike. “A mund të krahasohet me atë që vjedh e shpërdoron miliarda euro? A mund të krahasohet me atë që vjedh e shpërdoron miliona e miliona prona publike me metra katrorë? Si mund të krahasohet? Me këtë krahasim këta duan të vrasin përgjegjësinë. Të asgjësojnë përgjegjësinë. Duan të mbulojnë skandalet, krimin me gabime, me të meta, me defekte, që janë të pashmangshme,” shtoi ai. Në mbyllje të fjalës së tij para deputetëve, Berisha lëshoi akuza të rënda ndaj eksponentëve qeveritarë, duke i quajtur ata shkatërrues të së ardhmes. “Ka një problem tjetër madhor themelor. Këta duan të vrasin shpresën. Këta janë vrasësit e shpresës. Këta janë gjahtarët e shpresave të shqiptarëve. Këta janë llumi i llumit të shoqërisë shqiptare, armiqtë më të egër të qenies shqiptare,” përfundoi kryetari i PD-së.