Gjiganti francez vihet pas talentit shqiptar, PSG planifikon lëvizjen për Ibrahim Mazën

Paris Saint-Germain ka shprehur një interesim konkret për shërbimet e futbollistit Ibrahim Maza, teksa afati kalimtar i janarit po afrohet me hapa të shpejtë. Sipas informacioneve të siguruar, drejtuesit e klubit nga Parisi e kanë futur lojtarin në listën e ngushtë të dëshirave për përforcimin e skuadrës, ndërkohë që edhe kampi i lojtarit është plotësisht i informuar rreth këtij zhvillimi. Maza po konsiderohet seriozisht si një opsion i vlefshëm për fazën sulmuese, madje duke u vlerësuar edhe si një pasardhës i mundshëm i Khvicha Kvaratskhelias, nëse kampionët e Francës vendosin të veprojnë në këtë repart gjatë merkatos dimërore. Në krahun tjetër, te Bayer Leverkuseni nuk ka vend për panik pavarësisht insistimit të parisienëve, pasi klubi gjerman ka projekte afatgjata për të ardhmen e yllit të tyre. Plani i drejtuesve gjermanë konsiston në rinovimin e kontratës me Mazën deri në një afat që shkon përtej vitit 2030, marrëveshje kjo që do të shoqërohet edhe me përmirësim të kushteve financiare. Te skuadra nga Bundesliga, ai llogaritet si një gur themeli për të ardhmen dhe autoritetet e klubit nuk kanë ndërmend ta lejojnë largimin e tij pa luftë.