Aksidenti tragjik hekurudhor në Spanjë, yjet e La Ligës shpërthejnë ndaj ministrit

Opinioni publik në Spanjë është tronditur thellë nga përplasja tragjike e trenave në rajonin e Toledos, një ngjarje fatkeqe që la pas dhjetëra viktima dhe persona të plagosur. Ky incident i rëndë ka ngritur një valë reagimesh të forta, duke përfshirë edhe personalitetet e futbollit elitar spanjoll, të cilët kanë drejtuar akuza të ashpra ndaj Ministrit të Transportit, Oscar Puente. Futbollisti i Atletico Madrid, Marcos Llorente, ka shprehur hapur pakënaqësinë e tij përmes rrjeteve sociale, një qëndrim ky që ka gjetur menjëherë mbështetjen e dy yjeve të Real Madrid, Dani Carvajal dhe Thibaut Courtois, të cilët e kanë shpërndarë mesazhin e tij. Në thelb të kritikave të ashpra të Llorentes qëndron fokusi i tepruar i ministrit te platformat digjitale. "I dashur Oscar Puente, a nuk mendon se ka ardhur koha që të lësh mënjanë Twitter-in dhe të përqendrohesh te detyra për të cilën paguhesh?", shkruante Llorente në profilin e tij zyrtar në Instagram Story. Më tej, lojtari i njohur i Atletico Madrid ka vënë në pah domosdoshmërinë e garantimit të sigurisë për qytetarët që shfrytëzojnë rrjetin e transportit publik gjatë jetës së lor të përditshme. "Kur bëhet fjalë për jetë njerëzish, minimalja që mund të kërkohet nga një ministër transporti është përgjegjësia, serioziteti, siguria dhe respekti", vijonte më tej mesazhi i Marcos Llorentes, i cili nuk i kurseu kritikat ndaj qasjes së zyrtarëve shtetërorë në hapësirën digjitale. "Na ka ardhur në majë të hundës me politikanë që duken më të interesuar të fitojnë debate në rrjetet sociale si adoleshentë, sesa të përgjigjen në lartësinë e duhur institucionale ndaj përgjegjësive të tyre", theksonte futbollisti, duke kërkuar llogari për mangësitë në shërbime dhe rreziqet e vazhdueshme në sistemin e transportit. "Twitter-i nuk është detyra jote, detyra jote është transporti publik, siguria dhe dhënia e llogarisë kur gjërat shkojnë keq; deri më tani, në këtë drejtim, je një katastrofë", përfundonte reagimi i ashpër i Llorentes, i cili u ripostua masivisht edhe nga Carvajal dhe Courtois.