Arrestimi i Vlora Hysenit, Rama: Masa ishte ekstreme, drejtësia të zbardhë të vërtetën deri në fund

Kryeministri i vendit, Edi Rama, ka mbajtur një prononcim publik lidhur me ngjarjet e fundit pas ndalimit të ish-kryetares së SHISH, Vlora Hyseni, duke e vlerësuar këtë zhvillim si një situatë që kërkon vëmendje dhe veprim urgjent. "Vendosa të dal në këtë konferencë, sepse zhvillimet e fundit rreth arrestit të ish-drejtueses së SHISH kërkonin një sqarim. Ishte një masë ekstreme, por unë nuk kam të drejtë të vlerësoj arsyet pse Prokuroria ka kërkuar arrestimin. Nuk e kam bërë dhe nuk do ta bëj kurrë që të ndërhyj në çështjet e drejtësisë. Çdo akuzë duhet të shkojë deri në fund," deklaroi ai. Kreu i Qeverisë theksoi se respektimi i pavarësisë së sistemit të drejtësisë nuk nënkupton domosdoshmërisht heshtje. Sipas tij, përtej aspektit penal individual, ky rast përfshin edhe një parim themeltar shtetëror që nuk mund të shpërfillet apo të kalohet në heshtje. Rama shtoi se nuk është rasti i parë në shkallë globale që drejtuesi i një shërbimi sekret përballet me ligjin, por përbën rastin e parë që vetë institucioni i shërbimit sekret kthehet në cak të thashethemeve mediatike në rrafshin kombëtar dhe ndërkombëtar, si pasojë e mosmarrjes së masave standarde që shtetet zakonisht aplikojnë. Ai përsëriti se hetimi dhe gjykimi i Vlora Hysenit mbeten kompetencë ekskluzive e organeve të drejtësisë. "Mbrojtja e SHISH, si dhe e institucioneve të tjera, nga çdo dëm i panevojshëm kolateral është detyrim i gjithë shtetit. Parimi i ndarjes së pushteteve nuk mund të perceptohet si shkëputje nga mbikëqyrja shtetërore. Ka ardhur momenti ta trajtojmë këtë çështje bashkërisht dhe me seriozitetin më të madh. Besoj se Mbledhja e Këshillit të Sigurisë, e thirrur për nesër, është hapësira e duhur për të reflektuar mbi përgjegjësitë institucionale," përfundoi kryeministri.