“E vërteta e luftës nuk njolloset”: Qytetarët vërshojnë në Sheshin “Skënderbeu” për ish-krerët e UÇK-së

Qytetarët e shumtë kanë filluar të grumbullohen në Sheshin “Skënderbeu” në kryeqytetin e Maqedonisë së Veriut, në prag të nisjes së protestës gjithëpopullore të titulluar “Jo në emrin tim!”, e cila vjen si një akt solidariteti me ish-drejtuesit e Ushtrisë Çlirimtare të Kosovës që po ballafaqohen me drejtësinë. Sipas agjendës së përcaktuar nga Këshilli Organizativ, marshimi protestues është paraparë të startojë në orën 14:00. Thirrjes publike të shpallur ditë më parë i janë përgjigjur masivisht qytetarë të rëndomtë, ish-luftëtarë të lirisë, aktivistë të shoqërisë civile, si dhe personalitete e përfaqësues nga spektri i subjekteve politike shqiptare. Në prag të këtij tubimi, trupa organizative ka përsëritur apelin e saj drejtuar pjesëmarrësve që e gjithë kjo ngjarje të shpaloset përmes një qasjeje plotësisht paqësore, qytetare dhe në përputhje të plotë me standardet më të larta të dinjitetit njerëzor e kombëtar.