Tensionet në kulm: Ushtria iraniane premton përgjigje të ashpër ndaj SHBA-së dhe paralajmëron se lufta ka hyrë në fazë vendimtare

Forcat e armatosura të Iranit janë plotësisht të gatshme për t'u bërë ballë çdo sulmi të mundshëm nga Shtetet e Bashkuara të Amerikës, deklaroi të dielën zëdhënësi i ushtrisë, Mohammad Akraminia. Kjo deklaratë vjen menjëherë pasi presidenti amerikan, Donald Trump, bëri të ditur se kishte hedhur poshtë një ofertë iraniane që synonte rihapjen e Ngushticës së Hormuzit dhe ndalimin e armiqësive. Akraminia theksoi se ushtria iraniane mbetet e përgatitur për konfrontim dhe paralajmëroi se Uashingtoni do të përballet me dëme edhe më të rënda nëse ndërmerr ndonjë ofensivë të re kundër vendit të tij. Nga ana e tij, Komandanti i Përgjithshëm i Ushtrisë së Iranit, Amir Hatami, vlerësoi se konflikti ndodhet në një udhëkryq kritik dhe vendimtar, duke shtuar se Teherani nuk do të lejojë një realitet ku tregtia e tij bllokohet ndërkohë që aktorët e huaj shfrytëzojnë korridoret detare të rajonit. "Nëse Irani nuk mund të tregtojë, nëse Irani nuk mund të jetojë, askush nuk do të mund të tregtojë apo të jetojë. Ngushtica e Hormuzit është ngushtica e dinjitetit dhe nderit tonë; nuk do të lejohet që armiqtë e vendit ta përdorin këtë pikë kyçe logjistike, ndërkohë që populli iranian mbetet i privuar", u shpreh ai. Pavarësisht kësaj retorike, Teherani këmbënguli gjatë së dielës se vetëm rruga diplomatike mund të zgjidhë ngërçin aktual me SHBA-së dhe Izraelin. Ministri i Jashtëm iranian, Abbas Araghchi, u shpreh në rrjetet sociale se kushtet e tyre janë të qarta dhe se çdo hap drejt zhbllokimit të Ngushticës së Hormuzit varet nga përmbushja e tyre, duke shtuar se vetëm një zgjidhje e negociuar mund t'i japë fund kësaj krize. Paketa e paqes e Iranit u prezantua javën e kaluar në Asamblenë e Përgjithshme të OKB-së në Nju Jork, ku u theksua se ky plan i ishte dorëzuar palës amerikane përmes ndërmjetësve nga Katari. Megjithatë, të shtunën, presidenti Trump deklaroi se e kishte refuzuar këtë propozim, duke argumentuar se udhëheqësit iranianë janë në një gjendje dëshpërimi dhe po kërkojnë marrëveshje për shkak të humbjeve të rënda. "Ata duan të bëjnë një marrëveshje për të hapur menjëherë Ngushticën e Hormuzit sepse po humbasin rëndë", u deklaroi Trump gazetarëve në Shtëpinë e Bardhë. Ndërkohë, sipas ministrit Araghchi, ndërmjetësit që lehtësojnë dialogun nuk e kanë përcjellë ende zyrtarisht refuzimin amerikan, ndaj Teherani mbetet në pritje të qëndrimeve zyrtare për të marrë vendimin e radhës. Shtetet e Bashkuara kanë vendosur një bllokadë ekonomike ndaj Iranit për të ushtruar presion që të ndalen sulmet ndaj anijeve në Ngushticën e Hormuzit. Këto sulme kanë shkaktuar një rënie drastike të qarkullimit detar në zonë, pavarësisht pretendimeve të herëpashershme të presidentit Trump se SHBA-ja ushtron kontroll të plotë mbi këtë rrugë ujore jetike.