Ofertë konkrete nga Londra: Si e vlerësoi Vinicius Junior interesimin e Arsenalit gjatë verës

Gjatë merkatos së verës, emri i Vinicius Junior u lakua gjerësisht në media, ndërkohë që në qendër të vëmendjes u vu edhe një propozim konkret nga radhët e Arsenalit. Këto zhvillime tashmë janë konfirmuar zyrtarisht nga Michael Yormark, presidenti i agjencisë “Roc Nation”, e cila përfaqëson interesat e sulmuesit 26-vjeçar. Në një prononcim dhënë për platformën “Sportsboom”, përfaqësuesi i yllit brazilian pranoi se klubi londinez kishte formuluar një ofertë zyrtare dhe se futbollisti e kishte shqyrtuar atë me mjaft vëmendje. Sipas Yormark, kur një skuadër e madhe si Arsenali angazhohet maksimalisht dhe shfaq interesim të lartë, çdo sportist ka detyrim profesional ta analizojë me seriozitet një mundësi të tillë. Megjithatë, agjenti sqaroi se ambicia parësore e sulmuesit mbetet e lidhur ngushtë me Real Madridin, ku ai synon të vazhdojë karrierën për një periudhë të gjatë. Ai vuri në dukje se në futbollin e sotëm është dukuri e rrallë që një lojtar ta nisë dhe ta mbyllë rrugëtimin e tij te i njëjti klub, duke kujtuar se braziliani iu bashkua madrilenëve që në moshën 18-vjeçare. Duke folur për këtë çështje, Yormark u shpreh: “A e ka menduar ndonjëherë seriozisht Arsenalin? Sigurisht që e ka menduar. Kur një ekip si Arsenali shtron tapetin e kuq për ty dhe të bën të ndihesh sikur të duan vërtet, atëherë padyshim që duhet t’i kushtosh vëmendje. Por ai është aty ku dëshiron të jetë dhe ne jemi të lumtur që është atje. Nuk ndodh shpesh që një lojtar ta fillojë karrierën e tij në një klub dhe ta përfundojë atje. Ai e filloi udhëtimin e tij në moshën 18 vjeç dhe tani është 26 vjeç. Ai tashmë ka fituar kaq shumë trofe. Të qëndrosh në një klub dhe klubin më të mirë në botë për të gjithë karrierën tënde është diçka vërtet e veçantë”.