Largimi i Bedri Hamzës nga PDK-ja, reagon Driton Ajazi: Udhëheqja juaj mbetet shembull maturie

Ushtruesi i detyrës së kryetarit të degës së Partisë Demokratike të Kosovës (PDK) në Drenas, Driton Ajazi, ka bërë një reagim publik pas vendimit të Bedri Hamzës për të dhënë dorëheqjen nga udhëheqja e partisë. Nëpërmjet një shkrimi të ndarë me ndjekësit, Ajazi i është drejtuar Hamzës me fjalë falënderimi e mirënjohjeje, duke e vlerësuar lart angazhimin e tij në krye të subjektit politik gjatë një prej fazave më sfiduese të tij. Sipas tij, Hamza ka dëshmuar se është një personalitet që drejton me maturi dhe menaxhon situatat e vështira me qetësi shembullore. “Sot, Kryetar Bedri Hamza, me ndjenjë të veçantë respekti dhe mirënjohjeje, dua t’ju falënderoj për udhëheqjen e PDK-së në një nga periudhat më të vështira të saj. Për mua, ju mbeteni shembull i një lideri që di të udhëheqë me maturi, të përballet me sfida me qetësi dhe të ruajë vlerat e tij edhe në momentet më të vështira”, ka shkruar Ajazi në mesazhin e tij. Krejt në fund të reagimit, zyrtar i degës së Drenasit ka nënvizuar se funksionet zyrtare janë të përkohshme, ndërsa puna dhe vlera e vërtetë e një drejtuesi mbeten të paharrueshme, duke ritheksuar se konsiderata për Hamzën do të mbetet e pandryshuar. “Dorëheqja nga një pozitë nuk e zbeh kontributin, respektin dhe gjurmët që një njeri lë pas. Përkundrazi, ajo na kujton se vlerat e një lideri janë shumë më të mëdha se vetë posti që mban”, ka shtuar ai, për ta përmbyllur me një mesazh falënderimi për angazhimin e deritanishëm në shërbim të partisë dhe vendit.