Reagimi i fortë nga ish-ushtaraku: Simboli i UÇK-së nuk duhet të shfrytëzohet për interesa partiake apo personale

Ish-ushtaraku Hafir Hoxha ka ngritur zërin e tij lidhur me protestat e organizuara në kryeqytet, të cilat vijnë si kundërpërgjigje ndaj vendimit të Gjykatës Speciale për dënimin e ish-krerëve të Ushtrisë Çlirimtare të Kosovës. Përmes një reagimi publik, Hoxha ka bërë thirrje që emblema e shenjtë e UÇK-së të mos keqpërdoret për agjenda apo përfitime të ngushta personale, grupore dhe politike. Ai ka riafirmuar mbështetjen e tij të plotë për çlirimtarët që po mbahen në Hagë, duke e cilësuar vendimin ndaj tyre si të padrejtë dhe duke theksuar se ky simbol historik i përket gjithë popullit dhe nuk mund t'i atribuohet asnjë force politike. “Po mbështetjes për çlirimtarët në Hagë, po protestave kundër dënimit të lor të padrejtë dhe po thirrjes ‘jo në emër të popullit’! Por, jo përfitimeve personale, grupore e partiake nga kjo situatë me emblemën e shenjtë të UÇK-së. UÇK nuk është e asnjë partie, krejt Kosova është UÇK”, ka shprehur ai. Sipas tij, një grup i kufizuar individësh po përpiqet të shfaqet në këto tubime i mbuluar me simbolet e luftës, duke u munduar të tregohet më patriot dhe më guximtar sesa veteranët e vërtetë që e kanë bartur atë emblemë me sakrificë në kohën dhe vendin e duhur.