Ndërhyrja urgjente e motrës i shpëton jetën ish-sulmuesit të njohur

Pablo Daniel Osvaldo, ish-sulmuesi i klubeve të mëdha italiane si Interi, Roma dhe Juventus, është dërguar me urgjencë në spital si pasojë e një infeksioni të rëndë në mushkëri. Ngjarja ka ndodhur të enjten në Argjentinë, ku 40-vjeçari është ndjerë papritur keq, ndërsa jeta i është shpëtuar falë reagimit të menjëhershëm të motrës së tij dhe një miku, të cilët kanë njoftuar menjëherë urgjencën mjekësore. Për shkak të gjendjes kritike, ish-reprezentuesi italian është dashur t'i nënshtrohet një ndërhyrjeje kirurgjikale dhe madje është mbajtur përkohësisht nën kujdesin e reanimacionit. Megjithatë, burimet mjekësore konfirmojnë se situata tashmë është stabilizuar dhe ndodhet plotësisht nën kontrollin e mjekëve. Gjatë karrierës së tij të bujshme, Osvaldo ka lënë gjurmë të pashlyeshme në Serie A, veçanërisht te Roma, ku spikat shifra e tij prej 28 golash në 57 paraqitje zyrtare, sukses që i hapi dyert edhe për të veshur fanellën e kombëtares së Italisë. Kujtojmë se në vitin 2020, ish-sulmuesi vendosi t'i japë fund përfundimtar karrierës në fushën e blertë për t'iu përkushtuar dashurisë së tij tjetër, muzikës, duke u shndërruar tashmë në një këngëtar të njohur.