Superligë e nxehtë basketbolli sonte: Vëllaznimi kërkon kthesën ndaj Prishtinës, Ylli përballet me Borën

Adhuruesit e basketbollit vendor do të kenë mundësi të shijojnë dy sfida mjaft interesante mbrëmjen e sotme, në kuadër të javës së dytë të Superligës së Kosovës, ku skuadrat synojnë pikët e para për këtë edicion të ri. Ndeshja e parë do të zhvillohet në qytetin e Gjakovës, ku Vëllaznimi dhe Sigal Prishtina do të matin forcat në palestrën “Shani Nushi”, me fillim nga ora 17:00. Të dyja skuadrat futen në këtë takim me synimin e qartë për të regjistruar fitoren e parë sezonale. Ndërkohë, spektakli do të vazhdojë më vonë në Therandë, ku Golden Eagle Ylli do të presë skuadrën e Borës. Ky duel, që premton emocione të forta dhe rivalitet në parket, është planifikuar të nisë në ora 19:00 në palestrën “13 Qershori”.