Ndalim në kufirin e Bllatës: Autoritetet e Maqedonisë së Veriut bllokojnë ish-deputetin Azgan Haklaj

Ish-deputeti i Kuvendit të Shqipërisë, Azgan Haklaj, është ndaluar nga autoritetet kufitare të Maqedonisë së Veriut në pikën kaluese të Bllatës në Dibër, pasi emri i tij rezulton i përfshirë në listën e ndalimit, e njohur ndryshe si “Stop-listë”, një masë që zakonisht ndërmidhet për motive të sigurisë publike ose kombëtare. Der më tani, institucionet përgjegjëse të Maqedonisë së Veriut nuk kanë lëshuar ndonjë deklaratë zyrtare për të shpjeguar shkaqet e sakta të këtij ndalimi dhe se sa do të zgjasin procedurat e verifikimit. Gjatë këtij udhëtimi, Haklaj ka qenë i shoqëruar nga gazetari i mirënjohur shqiptar Ferdinand Samarxhiu. Ata po udhëtonin drejt Shkupit për të marrë pjesë në marshimin protestues të organizuar kundër vendimit të Gjykatës Speciale ndaj ish-krerëve të Ushtrisë Çlirimtare të Kosovës (UÇK). Azgan Haklaj, dikur deputet i Partisë Demokratike në Parlamentin shqiptar, është një personalitet i njohur në skenën politike, kulturore dhe kombëtare. Me origjinë nga Tropoja, ai ka një angazhim disavjeçar në mbrojtjen dhe promovimin e historisë, traditave dhe identitetit mbarëkombëtar. Krahas angazhimit politik, ai drejton Unionin Artistik të Kombit Shqiptar dhe mban titullin e lartë “Mjeshtër i Madh”, ndërsa ndër vite është dalluar për qëndrimet e tij të forta në mbrojtje të çështjes shqiptare, luftës çlirimtare të Kosovës, UÇK-së në Maqedoni dhe figurave që kanë kontribuar për lirinë.