Filharmonia e Kosovës shton praninë ndërkombëtare me dy shfaqje madhështore në Poloni

Orkestra dhe Kori i Filharmonisë së Kosovës bëhen gati për një tjetër paraqitje të rëndësishme në arenën ndërkombëtare, duke promovuar artin dhe kulturën tonë jashtë kufijve. Institucioni muzikor do të ngjitet në skenën e sallës prestigjioze të Filharmonisë së Krakowit, ku do të mbajë dy koncerte radhazi, respektivisht më 16 tetor me fillim nga ora 19:30 dhe më 17 tetor duke nisur nga ora 18:00. Interpretimi i këtyre veprave do të drejtohet nga dirigjenti Wojciech Czepiel. Ndërkaq, skena do të ndizet nga interpretimet e solistëve të shquar: violinistja Joanna Konarzewska, sopranoja Adelina Paloja, mezzosopranoja Ivana Hoxha, tenori Piotr Kalina dhe basi Arkadiusz Jakus. Repertori i përgatitur për këtë ngjarje artistike ndërthur bukur traditën muzikore polake me atë shqiptare. Publiku do të ketë mundësinë të shijojë kompozimet “Ciaccona” nga “Requiem Polak” të autorit Krzysztof Penderecki, poemën simfonike “Skënderbeu” të kompozitorit Fahri Beqiri, koncertin për violinë nr. 1, op. 35 të Karol Szymanowski-t, si dhe veprën “Homagium Matri Teresiae” nga Mendi Mengjiqi.