Këngëtarja e njohur Céline Dion shndërrohet në Barbie, kukulla frymëzohet nga nata e paharruar e “Oscar”-ëve 1998

Këngëtarja me famë botërore, Céline Dion, është nderuar nga gjiganti i lodrave “Mattel” me një kukull Barbie ekskluzive, e cila përjetëson imazhin e saj në një nga momentet më kulminante të karrierës së saj muzikore. Ky dedikim i veçantë vjen në një kohë tepër domethënëse për 58-vjeçaren, e cila po shënon rikthimin e saj të shumëpritur në skenë përmes rezidencës artistike në Paris. Figurina e re është skalitur duke u bazuar te fustani i saj elegant me ngjyrë blu të errët dhe mëngë të gjata, të cilin artistja kanadeze e kishte veshur gj26 vjet më parë, gjatë interpretimit të paharruar të këngës “My Heart Will Go On” – kolonës zanore të filmit “Titanic” – në skenën e ndarjes së çmimeve “Oscar” në vitin 1998. Një detaj tjetër që tërheq menjëherë vëmendjen te kjo kukull është varësja blu, e dizajnuar sipas gjerdanit legjendar “Zemra e Oqeanit”, i cili mban një rol qendror në kinematografinë e vitit 1997 nën regjinë e James Cameron. Në prodhimin kinematografik, personazhi Rose (e portretizuar nga Kate Winslet) e pranon këtë bizhuteri si dhuratë fejese nga i fejuari i saj, Caledon Hockley. Ky aksesor shndërrohet fillimisht në simbol të kufizimeve të saj dhe më pas shërben si mjet për të akuzuar gabimisht Jack-un (të luajtur nga Leonardo DiCaprio) për vjedhje. Gjatë mbrëmjes gala të “Oscar”-ëve në vitin 1998, Céline Dion kishte vendosur në qafë një kopje të kësaj bizhuterie, duke krijuar kështu një lidhje të pashlyeshme mes imazhit të saj dhe suksesit global të filmit “Titanic”. Duke ndarë emocionet e saj për këtë vlerësim, ylli i muzikës u shpreh se ndihet e privilegjuar që bëhet pjesë e botës së Barbie-t përmes një simboli kaq të fuqishëm nga rrugëtimi i saj artistik. “Është një nder i vërtetë t’i bashkohem trashëgimisë së Barbie-t me një kukull të frymëzuar nga një prej momenteve më domethënëse të karrierës sime. Shpresoj që kjo kukull t’i frymëzojë të gjithë të shprehen me vetëbesim, të ndjekin ëndrrat e tyre dhe të besojnë në fuqinë e zërit të tyre”, deklaroi Dion. Ky rikthim triumfues në vëmendjen publike vjen pasi këngëtarja u përball me sfidën e diagnostikimit me sindromën e personit të ngurtë (Stiff Person Syndrome), një çrregullim i rrallë neurologjik që prek sistemin muskulor, duke shkaktuar ngurtësi dhe spazma të dhimbshme.