Agjenda legjislative e ekzekutivit: Këto janë 200 projektligjet që synohen të miratohen në dy vitet e ardhshme

Qeveria e Kosovës ka bërë publike axhendën e saj legjislative për periudhën 2026-2028, e cila parashikon kalimin e një numri të konsiderueshëm nismash ligjore. Gjatë kësaj kohe, Zyra e Kryeministrit së bashku me dikasteret qeveritare synojnë të dërgojnë për miratim në Kuvendin e Kosovës gjithsej 200 projektligje. Për sa i përket Zyrës së Kryeministrit, gjatë vitit 2026 parashikohet shqyrtimi i Projektligjit për ndryshimin dhe plotësimin e Ligjit për Regjistrimin e Bujqësisë. Ndërkohë, tashmë kanë kaluar ratifikimi i amendamentit 1 të marrëveshjes për Programin IPA 2021, ratifikimi i amendamentit 1 të marrëveshjes për Programin IPA 2022, si dhe ratifikimi i marrëveshjes IPA 2026-2027. Në vitin 2027, ky institucion synon miratimin e ligjit për Hetimin e Aksidenteve, atij për Mbrojtje nga Diskriminimi, ligjit për Mbrojtjen e të Dhënave Personale nga Institucionet e Zbatimit të Ligjit, ndryshimin dhe plotësimin e Ligjit Nr. 02/L-31 për Lirinë Fetare në Kosovë, si dhe ligjin për Komisionin e Pavarur të Mediave. Ndërkaq, për vitin 2028 është planifikuar Projektligji për Mbrojtjen e Individëve në Lidhje me Përpunimin Automatik të Dhënave Personale. Nga ana e saj, Ministria e Punëve të Jashtme dhe Diasporës ka plane të ngjeshura për këtë vit, duke synuar miratimin e projektligjit për Shërbimin e Jashtëm, atij për Statusin, Imunitetet dhe Privilegjet e Misioneve Diplomatike, Konsullore dhe Personelit të Kosovës dhe Pranisë Ndërkombëtare Ushtarake si dhe Personelin e saj. Po ashtu, synohet ratifikimi i “Konventës për Njohjen dhe Ekzekutimin e Vendimeve të Huaja në Çështje Civile Apo Tregtare” dhe i “Konventës për Zgjedhjen e Marrëveshjeve Gjyqësore”. Në kuadër të të njëjtit dikaster, synohet gjithashtu miratimi i projektligjeve për Ratifikimin e “Konventës së Lubjanës-Hagës për Bashkëpunim Ndërkombëtar në Hetimin dhe Ndjekjen e Krimit të Gjenocidit, Krimeve Kundër Njerëzimit, Krimeve të Luftës dhe Krimeve të tjera Ndërkombëtare”, ratifikimin e Marrëveshjes për Ekstradim ndërmjet Qeverisë së Republikës së Kosovës dhe Qeverisë së Republikës Franceze, si dhe atë për Ndihmë të Ndërsjellë Juridike mes dy qeverive. Për vitin 2027, ky dikaster ka planifikuar Projektligjin për Marrëveshjet Ndërkombëtare, Projektligjin për Protokollin e Shtetit dhe Projektligjin për Diasporën. Ndërkohë, Ministria e Drejtësisë ka finalizuar deri më tani disa nisma të rëndësishme, duke përfshirë ndryshimin dhe plotësimin e ligjit për Përgjegjësitë Disiplinore të Gjyqtarëve dhe Prokurorëve, atë për Këshillin Gjyqësor të Kosovës, Projektligjin për Akademinë e Drejtësisë, si dhe ligjin për Rekrutimin, Vlerësimin e Performancës, Kontrollin e Integritetit dhe Statusin e Gjyqtarëve dhe Prokurorëve, Këshillin Prokurorial të Kosovës dhe Byronë Shtetërore për Verifikimin dhe Konfiskimin e Pasurisë së Pajustifikueshme. Gjatë këtij viti, ky dikaster synon po ashtu kalimin e Projektligjit për Ratifikimin e Marrëveshjes mes Republikës së Kosovës dhe Mbretërisë së Suedisë për Ndihmë të Ndërsjellë Juridike në Çështjet Penale, atij për Ekstradim dhe Transferimin e Personave të Dënuar me shtetin suedez. Gjithashtu, në fokus është edhe Projekt Kodri Civil i Republikës së Kosovës, si dhe Projektligji për Ratifikimin e Traktatit me Mbretërinë e Belgjikës për Ndihmë të Ndërsjellë Juridike në Çështjet Penale.