Nga dështimi në Itali te shkëlqimi verbues në Gjermani: Historia e ringjalljes së Christopher Nkunku

Largimi nga radhët e Milanit dhe rikthimi në futbollin gjerman po rezulton të jetë vendimi ideal në karrierën e Christopher Nkunku, i cili ka gjetur sërish ritmin e tij më të mirë nën fanellën e Leipzigut. Sulmuesi nga Franca po kalon një formë krejtësisht ndryshe nga edicioni i kaluar në Serie A, ku pati vështirësi duke realizuar vetëm 7 gola në 32 paraqitje me kuqezinjtë. Këtë stinë, ai e ka nisur aventurën në Bundesligë në mënyrë spektakolare, duke treguar menjëherë vlerat e tij me 4 gola të shënuar në vetëm pesë ndeshjet e para. Nkunku ishte protagonist absolut dhe lojtari i ndeshjes në triumfin e thellë 6:0 që Leipzig e arriti para adhuruesve të vet kundër Eintracht Frankfurtit. Sulmuesi e hapi llogarinë e golave që në minutën e 5-të pas një asistimi të saktë nga Antonio Nusa, duke i dhënë epërsinë skuadrës së tij që në fillim. Ai nuk u mjaftua me kaq dhe realizoi edhe dy herë të tjera brenda një hapësire prej tri minutash në fund të fraksionit të parë (minutat 41 dhe 44), duke kompletuar kështu het-trikun e tij të parë personal dhe duke e dërguar skuadrën në pushim me avantazhin e thellë 4-0. Gjatë pjesës së dytë, Leipzig shënoi edhe dy herë të tjera për të vulosur rezultatin përfundimtar 6-0. Vlen të theksohet se Nkunku luan për Leipzigun si i huazuar, ndërsa marrëveshja parashikon edhe opozitën e blerjes për 28 milionë euro. Nëse ai vazhdon me këto paraqitje fantastike, drejtuesit e klubit gjerman pritet të aktivizojnë klauzolën për ta blerë përfundimisht kartonin e tij nga klubi italian.