Kryeqyteti bëhet gati për derbi, trajneri Klafuriç: E njoh rëndësinë e kësaj sfide, synoj vetëm fitoren

Kryeqyteti po vishet me ngjyrat e një supersfide, ndërsa Tirana dhe Partizani do të matin forcat këtë të diel në stadiumin “Air Albania”, me sfidën që do të nisë në orën 18:30. Zbardhet atmosfera në kampin bardheblu përpara këtij takimi vendimtar. Në konferencën për shtyp para ndeshjes, trajneri i Tiranës, Klafuriç, u ndal te ndikimi që ka pasur ndërprerja e kampionatit për shkak të angazhimeve të kombëtareve, duke theksuar anët pozitive të kësaj periudhe. "Pauza e kombëtareve kishte si anët pozitive ashtu edhe ato negative, por unë prirem të shoh më shumë anën e mirë. Kemi punuar me kujdes në çdo aspekt dhe jam jashtëzakonisht i kënaqur që grupi është treguar i gatshëm dhe çdo gjë ka ecur sipas planit", u shpreh tekniku. Për Klafuriç ky është një debutim në derbin shqiptar, por ai e kupton qartë peshën e kësaj përballjeje, duke sjellë në vëmendje edhe përvojën e tij të kaluar ndërkombëtare. "E kam pasur të qartë këtë që ditën e parë dhe përbën një privilegj të jashtëzakonshëm të drejtoj në një derbi shqiptar. Unë kam jetuar emocione të ngjashme edhe në Kroaci apo në Varshavë, si dhe në vende të tjera të botës, ndaj ndihem krenar që sot drejtoj Tiranën", shtoi ai. Lidhur me situatën fizike të grupit, trajneri konfirmoi gatishmërinë e skuadrës, me të vetmin mungesë të konfirmuar prej kohësh, atë të Verës, ndërsa ka bërë të afrirmin e rikthimeve të rëndësishme. "Përveç Verës që mungon prej kohësh, pjesa tjetër e grupit gëzon formë optimale dhe lojtarët janë rikthyer. Përtej skemave taktike, kemi intensifikuar edhe punën në palestër me seanca të posaçme fitnesi për t'i dhënë mundësi futbollistëve të rikuperohen plotësisht për këtë duel të së dielës", tha Klafuriç. Dy rivalët e kryeqytetit ndahen nga vetëm një pikë në tabelë, ndërsa presioni mbetet një faktor i pashmangshëm në këtë lloj ndeshjesh. "Presioni është pjesë e natyrshme e futbollit dhe unë e mirëpres, pasi kam gjithë jetën në këtë sport. Ky lloj tensioni pozitiv na mban të karikuar. I uroj fat trajnerit të Partizanit, por shpresoj sinqerisht ta fitoj këtë ndeshje", përfundoi ai. Në një derbi, pozitat në klasifikim nuk kanë asnjë vlerë parësore pasi nuk ekzistojnë favoritë të përcaktuar. Ajo që vlen vërtet është shpirti i garës në fushë, dhënia e maksimumit dhe shfaqja e vlerave reale të skuadrës.