Qëndrim i prerë nga Sofja: Marrëveshja e vitit 2022 me Shkupin nuk preket

Autoritetet në Sofje refuzojnë çdo mundësi për ndryshime kushtetuese me afat të shtrirë në kohë dhe nuk pranojnë rinegociim të kushteve të përcaktuara në marrëveshjen e vitit 2022 me Maqedoninë e Veriut. Ky qëndrim u rikonfirmua në Kuvendin bullgar nga ministrja e Jashtme, Velisllava Petrova Çamova, vetëm një ditë pas bisedimeve zyrtare që pati në kryeqytetin bullgar me homologun e saj maqedonas, Timço Mucunski. Shefja e diplomacisë bullgare theksoi se kërkesat e shtetit të saj ndaj Shkupit mbeten të palëvizshme, duke kërkuar garanci për respektimin e të drejtave të pakicës bullgare dhe përfshirjen e tyre zyrtare në Kushtetutë. "A kemi arritur marrëveshje për ndryshime kushtetuese me zbatim të prolonguar? Përgjigja është “jo”. Ministria e Punëve të Jashtme qëndron pas marrëveshjes së vitit 2022 dhe kategorikisht hedhim poshtë mundësinë e çfarëdo anashkalimi, rinegociimi, dakordësie me vende të caktuara anëtare për çfarëdo lloj dakordësie që do të ndryshonin kushtet e marrëveshjes së arritur. Bullgaria nuk merr pjesë në rinegociimin e marrëveshjes me Shkupin. Nuk kemi nevojë për rinegociim dhe rimarrëveshje sepse ata janë të papranueshme për ne", deklaroi Velisllava Petrova Çamova, Ministre e Jashtme e Bullgarisë. Ministri Timço Mucunski dhe homonyma e tij bullgare zhvilluan një takim dypalësh në Sofje, në kuadër të zhvillimeve anësore të Konferencës për Korridorin 8, ku u diskutua edhe për mosmarrëveshjet mes dy shteteve. Ndonëse Mucunski e cilësoi takimin si konstruktiv dhe të zhvilluar në një atmosferë pozitive, ai pranoi se hendeku mes pozicioneve mbetet i madh. Ai vuri në dukje se sa i përket rrugës drejt Bashkimit Evropian, ekziston një nivel i lartë skepticizmi, i cili buron nga mungesa e parashikueshmërisë në proces dhe nga përvojat e kaluara me kushtëzimet dypalëshe. Ky takim u pasqyrua gjithashtu gjerësisht nga mediat kryesore në Bullgari. Pavarësisht se toni i bisedimeve u vlerësua si miqësor, agjencitë dhe transmetuesit kryesorë vendës vunë theksin te fakti se palët kanë mbetur kokëfortësisht në pozicionet e tyre, ndërsa Sofja nuk heq dorë nga kushtet e vendosura për integrimin evropian të Shkupit.