Tragjedi në Greqi: Humb jetën 49-vjeçari shqiptar pas rrëzimit nga skela në kantierin e punës

Një ngjarje e rëndë ka tronditur komunitetin e emigrantëve shqiptarë në Greqi, pasi një aksident fatal në vendin e punës i ka marrë jetën një 49-vjeçari. Ngjarja tragjike është regjistruar në zonën e Kato Kamilës, në Serres të Greqisë. Sipas të dhënave paraprake, viktima ka qenë duke punuar në një kantier kur është rrëzuar nga skela ku po zhvilloheshin punimet. Për shkak të dëmtimeve të rënda, 49-vjeçari nuk ka mundur t'u mbijetojë plagëve, duke ndërruar jetë pak pasi ishte dërguar në Spitalin e Serresit për të marrë ndihmën mjekësore. Autoritetet bëjnë me dije se incidenti i rëndë ka ndodhur rreth orës 11:30 paradite, ndërkohë që rrethanat e sakta se si u shkaktuar rënia mbeten ende për t'u sqaruar. Në lidhje me këtë tragjedi, organet kompetente kanë nisur një hetim të detajuar për të hedhur dritë mbi dinamikën e ngjarjes dhe për të verifikuar nëse në kantier respektoheshin standardet dhe kushtet e sigurisë në punë.