Luis Figo flet hapur: Barcelona fluturon në La Liga, por Real Madridi do të luftojë deri në fund

Ish-lojtari i njohur portugez, Luis Figo, i cili aktualisht mbajti detyrën e këshilltarit të UEFA-s, ka analizuar ecurinë e deritanishme në kampionatin spanjoll, duke ndalur theksin te paraqitjet fantastike të katalanasve dhe situata ku ndodhet skuadra e tij e zemrës, Real Madridi. Gjatë një interviste dhënë për “Radio Marca”, ai e ka cilësuar si mbresëlënëse nisjen e sezonit nga Barcelona, e cila ka grumbulluar pikët e plota, ka realizuar 31 gola dhe mban një diferencë prej gjashtë pikësh në krye të renditjes. “E ka nisur shumë fort. Po fiton, po luan mirë, po shënon gola”, u shpreh ai. Megjithatë, duke qenë një njohës i mirë i futbollit, portugezi ka ftuar në maturi, duke kujtuar se rrugëtimi është ende i gjatë. “Duhet të shohim se si do të zhvillohet sezoni, sepse është shumë i gjatë”, theksoi Figo, i cili shtoi gjithashtu se ky nivel i lartë konkurrence është një shenjë pozitive për mbarë futbollin spanjoll. I pyetur rreth derbit mes Atlético Madridit dhe Real Madridit, që përfundoi me rezultatin 2-0, Figo tregoi se nuk e kishte ndjekur takimin pasi ndodhej në Zyrih. Sa i përket polemikave dhe deklaratave të José Mourinhos ndaj gjyqtarëve, ai zgjodhi të ruajë një qasje neutrale: “Ka bërë atë që mendoi se duhej të bënte në atë moment. Nuk kam pse ta komentoj. Besoj se janë veprime personale dhe, nëse e ka bërë, është sepse ashtu e ka ndier”. Pavarësisht se “Los Blancos” ndodhen gjashtë pikë larg kreut, ish-ylli portugez shprehu besim të plotë te karakteri i skuadrës madrilene. “Jam i sigurt se Reali do të luftojë deri në fund. Kjo është një garë që duhet të jetë e rregullt deri në maj”, deklaroi ai, duke shtuar se uljet dhe ngritjet janë normale gjatë një edicioni futbollistik dhe se për t'ia dalë, nevojitet pjekuri dhe cilësi në momentet më të vështira. Në lidhje me çmimin prestigjioz “Topi i Artë”, afati i votimit të të cilit mbyllet të hënën e ardhshme, Figo u tregua i rezervuar: “Ai që ka fuqinë për të vendosur është ai që voton. Duhet të presim të shohim çfarë do të ndodhë. Unë nuk votoj, ndaj nuk e kam këtë problem në kokë”. Në fund të prononcimit të tij, ai nuk la pa përmendur edhe sulmuesin francez Kylian Mbappé, për të cilin pati fjalë vlerësimi: “Gjithmonë është në një nivel shumë të lartë. Na ka mësuar të jetë një prej më të mirëve në botë dhe të shënojë gola”.