Kërcënimi nga Bjellorusia para përballjes: Besojmë te fitorja kundër Shqipërisë, jemi superiorë

Sulmuesi i kombëtares së Bjellorusisë, German Barkovski, ka shprehur besim të plotë se skuadra e tij do të triumfojë në stadiumin “Air Albania” në kuadër të Ligës së Kombeve. Në prag të këtij dueli, futbollisti që aktivizohet me Polonia Varshavë ka vënë në pah ecurinë pozitive të ekipit dhe ambiciet e larta që ata kanë për të arritur rezultate domethënëse. “Grupi ynë gëzon një harmoni të shkëlqyer dhe marrëdhëniet mes lojtarëve janë në nivelet më të larta. Shpresoj shumë që këtë ritëm ta pasqyrojmë edhe në fushën e blertë. Jemi duke analizuar kundërshtarin dhe opsionet tona, megjithëse nuk e shoh të nevojshme të hyjmë në detaje. Dëshira ime është që vlerat tona t'i dëshmojmë aty ku duhet, në fushë”, u shpreh fillimisht ai. Duke analizuar forcën e Kombëtares shqiptare, Barkovski pranoi cilësitë e kuqezinjve, por insistoi se përfaqësuesja e tij zotëron potencial më të madh për të marrë tri pikët. “Shqipëria ka një skuadër cilësore, mirëpo unë jam i bindur se ne jemi më të fortë dhe kem kapacitetin për t'i mposhtur. Do të bëjmë çmos që këtë synim ta shndërrojmë në realitet”, shtoi ai. Në mbyllje të deklaratës së tij, sulmuesi bjellorus rikonfirmoi se grupi synon majat dhe se do të sakrifikojë gjithçka për të përmbushur objektivat madhorë që i kanë vënë vetes për këtë edicion.