Skandal në Radovish: Prodhonin akull për treg në kushte skandaloze dhe me ujë ilegal, sekuestrohen 850 kilogramë

Policia ka ndërmarrë masa ligjore ndaj dy banorëve nga qyteti i Radovishit, pasi u zbulua se ushtronin aktivitet të paligjshëm të prodhimit të akullit në mjedise johigjienike, ndërsa analizat laboratorike konfirmuan praninë e baktereve të rrezikshme. Për më tepër, lëndën e parë, respektivisht ujin, ata e siguronin përmes një kyçjeje ilegale në rrjetin e furnizimit. Sektori për Punë të Brendshme në Strumicë, në bashkëpunim me Stacionin Policor të Radovishit, ka dorëzuar kallëzim penal pranë Prokurorisë Themelore Publike kundër shtetasve T.D. (62) dhe S.D. (62), të dy nga Radovishi. Ata dyshohen për veprën penale “prodhimi dhe nxjerrja në qarkullim e produkteve të dëmshme ushqimore dhe produkteve të tjera”, e cila sanksionohet sipas nenit 213 të Kodit Penal. Sipas hetimeve, të dyshuarit prej disa vitesh vepronin si prodhues të paregjistruar, duke përgatitur akull në kushte improvizimi dhe pa respektuar asnjë standard higjienik. Produkti i tyre më pas shpërndahej në mënyrë të pasigurt për konsum, duke iu shitur si personave juridikë ashtu edhe atyre fizikë. Operacioni u zhvillua më 16 shtator 2026, kur zyrtarët policorë, mbështetur nga një urdhër gjyqësor dhe në koordinim të ngushtë me inspektorët e Agjencisë për Ushqim dhe Veterinari, zbarkuan në katër lokacione të ndryshme të shfrytëzuara nga të dyshuarit. Gjatë kontrollit në tarracën e përdheses së shtëpisë ku banonin, autoritetet zbuluan ngrirëse të mbushura me sasi të mëdha qesesh me kuba akulli. Ky mall mbahej gati për shitje përmes një sistemi vetëshërbimi, ndërsa të ardhurat financiare nga blerjet liheshin në një kuti të caktuar. Në hapësirat e bodrumit, situata rezultoi edhe më alarmante, pasi atje u gjetën katër makineri profesionale për prodhimin e akullit në kube, si dhe një frigorifer tjetër i madh i mbushur me sasi të konsiderueshme akulli të paketuar për treg. Me urdhër të inspektorit shtetëror, ekspertët nga një laborator i akredituar morën mostra të ujit si lëndë e parë, të produktit të gatshëm nga tre ngrirëse, si dhe nga vetë pajisjet prodhuese, për t'i nënshtruar analizave të detajuara mikrobiologjike dhe kimike. Rezultatet e analizave dëshmuan se ndonëse uji i përbashkët plotësonte kriteret e sigurisë për pije, të gjitha mostrat e tjera të akullit të gatshëm dhe të pajisjeve nuk përmbushnin parametrat e kërkuar. Në to u konfirmua prania e baktereve të llojit Escherichia coli dhe baktereve koliforme, çka vërtetoi se akulli ishte i kontaminuar me origjinë fekale, i rrezikshëm dhe tejet i dëmshëm për shëndetin e qytetarëve. Menjëherë pas daljes së rezultateve, Agjencia për Ushqim dhe Veterinari ndërhyri duke vulosur dhe sekuestruar të gjitha pajisjet prodhuese dhe rreth 850 kilogramë akull të gatshëm për shitje, bënë të ditur autoritetet policore. Gjatë inspektimeve u zbulua gjithashtu se furnizimi me ujë në bodrum bëhej përmes tubacioneve të lidhura në mënyrë të fshehtë. Përfaqësuesit e ndërmarrjes publike “Plavaja” konfirmuan në terren se ky kyçje nuk regjistrohej fare përmes ujëmatësit zyrtar. Në fund të aksionit, dy të dyshuarit janë arrestuar nga policia dhe janë dërguar në mbajtje në Stacionin Policor të Radovishit për procedura të mëtejshme hetimore.