Kriza e motit në Tajlandë: Bangkok-u shpall gjendjen e emergjencës në të gjitha distriktet për shkak të ujërave

Kryeqyteti i Tajlandës, Bangkok, është përfshirë nga një gjendje alarmi pasi autoritetet kanë shpallur zyrtarisht gjendjen e emergjencës në të 50 distriktet e qytetit. Kjo masë ekstreme vjen pas një intervali prej 48 orësh me reshje të pandërprera shiu, të cilat kanë bllokuar rrugët dhe kanë çuar në pikën e fundit kapacitetet e sistemit të kullimit të metropolit. Stafi përgjegjës u ka bërë thirrje qytetarëve që të kufizojnë lëvizjet dhe të qëndrojnë në banesat e tyre. Për më tepër, ata që banojnë pranë rrjetit ujor të kanaleve janë udhëzuar të ngrenë sendet e tyre me vlerë në katet e larta, duke qenë se niveli i ujit vijon të ngrihet me ritme të shpejta. Breshëria e shiut ka paralizuar qarkullimin rrugor në akset kryesore, ndërkohë që parashikimet metereologjike tregojnë se moti i keq do të vijojë edhe në ditët në vijim, duke rritur frikën për një përkeqësim të mëtejshëm të situatës. Somkid Pheuk-ngam, një banor 67-vjeçar nga zona veriore e Bangkokut, u shpreh se niveli i ujit pranë banesës së tij kishte mbërritur deri në bel. Sipas dëshmisë së tij, ai ka dy ditë që ka ulur grilat e dyqanit dhe e ka të pamundur të braktisë atë perimetër. Këto zhvillime kanë sjellë në vëmendje kujtimet e përmbytjeve shkatërruese të vitit 2011, të cilat përbëjnë një nga ngjarjet më të rënda klimatike në historinë e vendit. Gjatë asaj periudhe tragjike, qindra qytetarë humbën jetën dhe situata e jashtëzakonshme zgjati për afro tre muaj. Megjithatë, deri në këto momente, strukturat shtetërore nuk kanë konfirmuar asnjë humbje jete si pasojë e vërshimit aktual të ujërave në Bangkok. Sipas Shërbimit Meteorologjik të Tajlandës, reshjet e dendura parashikohet të shoqërojnë gjithë javën, ndërsa një fushë me presion të ulët atmosferik pritet të shtrihet drejt pjesës qendrore të vendit. Nga ana e tij, Guvernatori i Bangkokut, Chadchart Sittipunt, bëri të ditur se sektori lindor i qytetit përballet me pasojat më të rënda. “Shiu vazhdon të bjerë dhe ne po bëjmë çmos. Po përpiqemi ta nxjerrim ujin me pompa, por kanalet janë plot”, theksoi ai, duke vënë në dukje se banorët pranë tyre mbeten kategoria më e rrezikuar. Në terren, ekipet e shpëtimit dhe strukturat përgjegjëse po punojnë intesivisht për evakuimin e ujit përmes pompave dhe për të mbajtur nën vëzhgim nivelet e kanaleve. Autoritetet u bëjnë thirrje qytetarëve që të respektojnë udhëzimet zyrtare dhe të shmangin çdo lëvizje të panevojshme jashtë shtëpive.