Çështja “Hyseni”: Brukseli refuzon komentin, por lëshon mesazh të fortë mbështetjeje për SPAK-un

Bashkimi Europian ka shmangur një koment direkt lidhur me hetimet ndaj ish-kryetares së Shërbimit Informativ Shtetëror, Vlora Hyseni, por ka përcjellë një qëndrim të qartë institucional, duke theksuar besimin e plotë te puna e Strukturës së Posaçme Kundër Korrupsionit dhe Krimit të Organizuar (SPAK). I pyetur nga gazetarët për masën e sigurisë “arrest në shtëpi” ndaj ish-drejtueses së lartë, zëdhënësi i Komisionit Europian për Zgjerimin, Guillaume Mercier, theksoi se pozicioni zyrtar i Brukselit është të mos paragjykojë apo komentojë procese hetimore që ndodhen ende në zhvillim e sipër. Megjithatë, duke iu shmangur specifikave të dosjes hetimore, zëdhënësi i BE-së vuri theksin te rëndësia e reformave në drejtësi dhe ecurisë së vendit në luftën kundër korrupsionit. “Ne nuk komentojmë çështje që janë në proces, por ajo që mund të themi është se ne i ndjekim nga afër zhvillimet që lidhen me shtetin e së drejtës, veçanërisht reformat në drejtësi dhe luftën kundër krimit të organizuar dhe korrupsionit, fusha në të cilat Shqipëria ka bërë përparim të konsiderueshëm”, deklaroi Mercier. Në vijim të prononcimit të tij, përfaqësuesi i Komisionit Europian ripërsëriti mbështetjen e pakushtëzuar për institucionin e akuzës në Tiranë. “Kemi besim të plotë tek aftësia e Strukturës së Posaçme Kundër Korrupsionit dhe Krimit të Organizuar, e njohur si SPAK, për të zbuluar, hetuar dhe ndjekur penalisht krimin e organizuar”, u shpreh ai. Në këtë mënyrë, ndërsa Brukseli ka preferuar të ruajë neutralitetin sa i përket provave apo pozicionit juridik të Vlora Hysenit, ai i ka dhënë një mbështetje të fuqishme mandatit dhe pavarësisë së organit hetues për të çuar deri në fund këtë çështje. Në mbyllje të prononcimit të tij, zëdhënësi i BE-së konfirmoi se komunikimi dhe bashkëpunimi institucional me palën shqiptare mbeten të vazhdueshme dhe intensive. “Në një këndvështrim më të gjerë, ne jemi gjithmonë në kontakt me homologët shqiptarë”, përfundoi Mercier.