Ndeshja Shqipëri-Bjellorusi: Policia e Shtetit zbardh planin e detajuar të sigurisë dhe bllokimin e rrugëve

Për të garantuar rendin dhe sigurinë publike gjatë, para dhe pas përfundimit të sfidës futbollistike ndërmjet kombëtares së Shqipërisë dhe asaj të Bjellorusisë, Policia e Shtetit ka finalizuar një plan të detajuar masash. Ndeshja e rëndësishme do të luhet këtë mbrëmje, duke filluar nga ora 20:45, në ambientet e stadiumit “Air Albania”. Strategjia e sigurisë mbështetet tek ekspertiza e mëparshme e suksesshme e strukturave të rendit gjatë organizimit të ngjarjeve të rëndësishme ndërkombëtare, duke ndarë detyra konkrete për çdo strukturë operacionale të angazhuar në menaxhimin e mbarëvajtjes së kësaj nate sportive. Në kuadër të masave të rrepta të sigurisë, efektivët e policisë do të ushtrojnë kontrolle të imtësishme ndaj të gjithë tifozëve në hyrje të stadiumit. Ky veprim ka për qëllim kryesor ndalimin e futjes së banderolave me mesazhe raciste, fishekzjarrëve, flakadanëve, mjeteve piroteknike, monedhave metalike, çadrave, çakmakëve, karikuesve të telefonave, produkteve kozmetike, si dhe çdo sendi tjetër të fortë që mund të përbëjë rrezik për jetën dhe integritetin e personave të pranishëm. Për të shmangur radhët e gjata dhe vonesat në hyrje për shkak të fluksit të lartë pak minuta para startit të takimit, autoritetet policore u bëjnë thirrje sportdashësve që të paraqiten pranë dyerve të stadiumit duke nisur nga ora 18:30. Qindra punonjës policie do të jenë në terren për të ofruar ndihmë, orientim dhe për të siguruar një atmosferë sa më të qetë, me synimin që ky aktivitet të mbyllet pa asnjë incident dhe të mbrohet imazhi i vendit. Në bashkëpunim të ngushtë me Policinë Bashkiake të Tiranës, Policia e Shtetit ka parashikuar gjithashtu kufizime të qarkullimit të automjeteve në disa akse pranë stadiumit, gjatë datës 26.09.2026, duke filluar nga ora 17:00 e deri në mbylljen e ndeshjes. Qëllimi është lehtësimi i lëvizjes dhe garantimi i fluksit normal në kryeqytet. Akset rrugore që do të jenë të bllokuara në këtë fashë orare përfshijnë Bulevardin “Dëshmorët e Kombit” (nga fast food-i “Laguna” pranë urës së ish-Hotel Dajtit), rrugën “Papa Gjon Pali II” te kryqëzimi i RTSH-së, rrugën “Dervish Hima” dhe “Asim Zeneli” pranë Ambasadës së SHBA-së, hyrjen e rrugës “Themistokli Gërmenji”, si dhe rrugën “Ismail Qemali” te kryqëzimi i RTSH-së. Po ashtu, bllokime do të ketë në rrugën “Lekë Dukagjini” pranë ish-Gardës së Republikës (e cila do të shërbejë si korridor hyrjeje për në parkingun e rezervuar vetëm për mjetet e pajisura me autorizim nga Federata Shqiptare e Futbollit), në rrugën “Abdyl Frashëri” pranë kryqëzimit të Librit Universitar, ndërsa te sheshi “Willson” trafikau do të devijohet drejt rrugës “Sami Frashëri” pak para mbylljes së takimit. Për lehtësimin e qarkullimit të qytetarëve, autoritetet njoftojnë se Rruga e Elbasanit, Unaza e Madhe dhe bulevardi “Bajram Curri” do të mbeten plotësisht të lira për lëvizjen e mjeteve gjatë gjithë kësaj kohe.