Tragjedia e luftës në Kosovë nuk mund të fshihet: Shoqata “Përkorë” ashpër kundër deklaratave të Vuçiqit në OKB

Shoqata e Familjarëve “Përkorë” ka ngritur zërin fuqishëm kundër deklaratave të fundit të presidentit serb, Aleksandar Vuçiq, të dhëna në Asamblenë e Përgjithshme të Kombeve të Bashkuara, ku ai hodhi poshtë ekzistencën e një katastrofe humanitare në Kosovë gjatë periudhës së luftës 1998-1999. Në krye me Latif Mehmetin, kjo shoqatë thekson se mohimi i krimeve të dokumentuara përbën një goditje të rëndë për dhimbjen e mijëra familjeve që ende kërkojnë më të dashurit e tyre, ndërkohë që kujtojnë se mbi 800 mijë shqiptarë u dëbuan me forcë drejt Shqipërisë dhe Maqedonisë së atëhershme, mes vrasjeve dhe zhdukjeve masive. Si dëshmi e pakundërshtueshme e gjenocidit dhe krimeve shtetërore të kryera nga Serbia, nga kjo shoqatë përmenden trupat e pajetë të gjetur në varrezat masive në Batajnicë, Petrovo Selo, Peruçac, Rudnicë dhe Kizhevak, të cilat u transportuan fshehurazi përtej kufirit. Përfaqësuesit e familjarëve shtrojnë pyetje madhore drejt përgjegjësisë institucionale: kush dha urdhër për këtë transferim makabër trupash, kush organizoi fshehjen e tyre dhe mbi kë rëndon faji? Këto dilema kërkojnë adresim të prerë nga drejtësia ndërkombëtare dhe vendase. Përballë kësaj vale mohimi, Shoqata “Përkorë” i bën thirrje urgjente institucioneve shtetërore të Kosovës që provat dhe faktet e luftës t'i paraqesin me insistim dhe në mënyrë të vazhdueshme para arenës ndërkombëtare. “E vërteta për viktimat, të zhdukurit dhe familjet e tyre nuk mund të fshihet përmes mohimit apo propagandës. Familjet kërkojnë të vërtetën, drejtësinë dhe përgjegjësinë për të dashurit e tyre”, përfundon deklarata e shoqatës me seli në Podujevë. Kujtojmë se gjatë fjalimit të tij të së mërkurës në Nju Jork, numri një i shtetit serb mohoi përgjegjësinë e forcave të sigurisë dhe atyre paramilitare për krizën humanitare në Kosovë, duke drejtuar akuza ndaj ndërhyrjes së NATO-s më 1999 dhe duke sulmuar Kroacinë për gjoja “ringjallje të nazizmit”.