Gjendje alarmante: Ish-sulmuesi i njohur përfundon në terapi intensive pas një komplikimi të rëndë shëndetësor

Dani Osvaldo, ish-sulmuesi i njohur i Juventusit, Southamptonit dhe përfaqësueses italiane, po kalon momente kritike pasi është shtruar urgjentisht në repartin e kujdesit intensiv në Argjentinë, për shkak të një patologjie serioze të mushkërive. Prej disa ditësh, 40-vjeçari po vuante nga dhimbje të padurueshme në zonën e kraharorit, ndërsa mbrëmjen e të enjtes situata e tij shëndetësore u përkeqësua ndjeshëm, duke detyruar dërgimin e tij me shpejtësi në spital. Ekipi mjekësor ka diagnostikuar një derdhje pleurale në anën e djathtë. Ish-lojtari u transportua në Spitalin Komunal Llavallol, që ndodhet në Lomas de Zamora. Komplikimet e shkaktuara nga grumbullimi i lëngjeve dhe qelbit në organet e frymëmarrjes e detyruan stafin mjekësor të ndërhynte menjëherë për të shmangur pasoja më të rënda. Pas ndërhyrjes fillestare, Osvaldo u transferua pa vonesë në zonën e terapisë intensive, ku mjekët po e mbajnë nën mbikëqyrje të rreptë, ndërkohë që gjendja e tij vazhdon të mbetet mjaft delikate. Ky lajm tronditës për emergjencën mjekësore të ish-futbollistit u bë i ditur për publikun nga gazetari Pepe Ochoa gjatë transmetimit të emisionit argjentinas “LAM”, i drejtuar nga Angel de Brito. Sipas gazetarit, gjendja e tij ka qenë jashtëzakonisht e rëndë për shkak të infeksionit në mushkëri. Ai shpjegoi se mjekët i kanë hequr lëngje nga të dyja anët, ndërsa konfirmoi edhe diagnozën e derdhjes pleurale të djathtë. Gjatë të njëjtit emision, u bë e ditur se ish-sulmuesi i Boca Juniors ka kaluar së fundmi edhe një periudhë me sfida të mëdha personale, duke përfshirë ngërçe financiare dhe mungesën e një police sigurimi shëndetësor privat, çka e ka vënë atë në një pozitë edhe më të vështirë përpara këtij shtrimi emergjent.