Këmbanat e alarmit në kampin austriak: Kapiteni rrezikon sfidën kundër Kosovës

Përfaqësuesja e Austrisë rrezikon të zbarkojë në fushë këtë të diel pa një nga lojtarët e saj kyç, i cili mban edhe statusin e ish-kapitenit, në përballjen e rëndësishme kundër Kosovës. Bëhet fjalë për sulmuesin Michael Gregoritsch, gjendja e të cilit është vënë në pikëpyetje për takimin që do të zhvillohet në Vjenë, duke filluar nga ora 18:00, pavarësisht se ai ka shmangur një dëmtim më të rëndë nga ndeshja e fundit. Sulmuesi shtatlartë austriak dëëmtoi nyjën e këmbës gjatë triumfit 3-1 kundër Izraelit në qytetin e Linz-it, situatë që e detyroi atë të braktisë fushën e blertë që në 45-minutëshin e parë, ndërsa vendin e tij e zuri Sasha Kalajdzic. Burime zyrtare nga Federata Austriake e Futbollit kanë bërë të ditur për agjencinë e lajmeve APA se dëmtimi nuk paraqitet alarmant. Për të mësuar shkallën e saktë të lëndimit, Gregoritsch iu nënshtrua ekzaminimeve me rezonancë magnetike gjatë ditës së premte. Pavarësisht lajmeve lehtësuese rreth shëndetit të tij, orari i ngjeshur dhe koha e pakët në dispozicion për rikuperim e bëjnë tejet të dyshimtë paraqitjen e tij ndaj “Dardanëve”. Në këtë linjë, përzgjedhësi Ralf Rangnick ka theksuar se stafi teknik nuk do të ndërmarrë rreziqe të panevojshme me 32-vjeçarin për ndeshjen e së dielës. “Ai e zuri keq nyjën dhe u mundua që ta lidhë, por kishte telashe dhe u desh të ndalej. Nuk duket lëndim serioz, por ndeshja ndaj Kosovës është shumë shpejt. Ndoshta do të jetë i gatshëm për dy ndeshjet tjera”, deklaroi Rangnick pas fitores ndaj Izraelit.