Rio Ferdinand ashpër ndaj gazetarit: Lëre Ronaldon të qetë, fjalori yt është i papranueshëm!

Ish-mbrojtësi i njohur i Manchester United, Rio Ferdinand, ka marrë në mbrojtje Cristiano Ronaldon, duke i dhënë një përgjigje të ashpër artikullit kritik të gazetarit të njohur të “Mirror Football”, Harry Brent. Në shkrimin e tij të titulluar “Narcisisti Cristiano Ronaldo duhet larguar pas 2,000 fjalëve me ankesat e tij për Portugalinë”, gazetari kishte drejtuar akuza të rënda dhe kritika të hapura në drejtim të sulmuesit portugez. Reagimi i Ferdinand nuk vonoi, teksa ai zgjodhi platformat sociale për t’i adresuar një mesazh të drejtpërdrejtë autorit të artikullit: “Terminologji e çmendur për t’u përdorur për dikë që i ka dhënë kaq shumë këtij sporti dhe vendit të tij. Harry Brent, mblidhe pak veten!” Legjenda e futbollit anglez e ka quajtur plotësisht të pavend dhe të padrejtë etiketimin e yllit portugez si “narcisist”, duke theksuar se kontributi i tij kolosal ndër vite si në arenën ndërkombëtare ashtu edhe në atë klubnore meriton respekt maksimal dhe jo sulme të tilla.