Deputeti i PD zbulon letrën që i ka çuar ish-kryetares së SHISH, Vlora Hysenit

Deputeti i Partisë Demokratike, Klevis Balliu, ka folur lidhur me letrën që i kishte dërguar ish-drejtoreshës së Shërbimit Informativ Shtetëror, Vlora Hyseni. Balliu tha se Hyseni i është përgjigjur zyrtarisht letrës së tij, por përmbajtja e përgjigjes nuk mund të bëhet publike për shkak të natyrës së informacionit. “Kam çuar një letër për të cilën më ka kthyer përgjigje. E kam pyetur edhe në komision. Përgjigjen unë nuk mund ta them sepse edhe ajo përgjigje është sekret për shkak të natyrës së punës që kishte zonja dhe institucioni”, tha Balliu përEuronews Albania. Ai shtoi se përgjigjja ekziston dhe se mund të kërkohet zyrtarisht, por sipas tij, pa deklasifikimin e saj nuk mund të japë detaje të mëtejshme. Balliu foli edhe për diskutimet në komision, duke pretenduar se pyetjet e tij lidhur me marrëdhënien e Vlora Hysenit me Gys Agasin ishin përqeshur nga disa kolegë. Ai tha gjithashtu se opozita kërkon që institucionet të mbajnë përgjegjësi dhe që prokuroria të kryejë detyrën e saj për të hetuar çështjet për të cilat është ngritur shqetësimi.