Netanyahu në OKB sulmon Perëndimin dhe mbron veprimet ndaj Iranit

Kryeministri izraelit Benjamin Netanyahu mbajti një fjalim të ashpër në Asamblenë e Përgjithshme të Kombeve të Bashkuara, ku mbrojti veprimet e Izraelit në Lindjen e Mesme dhe kritikoi ashpër disa vende perëndimore, Iranin dhe kryetarin e Nju Jorkut, Zohran Mamdani. Në fillim të fjalimit, përfaqësues të disa vendeve u larguan nga salla. Netanyahu i cilësoi ata si “frikacakë moralë”, duke argumentuar se largimi i tyre nuk do ta pengonte atë të shprehte qëndrimet e tij. Duke folur për konfliktin izraelito-palestinez, Netanyahu tha se çështja, sipas tij, nuk lidhet vetëm me territorin, por me vetë ekzistencën e Izraelit si shtet hebre. “Ky konflikt nuk ka të bëjë me territorin. Ka të bëjë me ekzistencën e një shteti hebre brenda çdo kufiri”, tha Netanyahu. Ai kritikoi gjithashtu vendet evropiane, përfshirë Francën dhe Britaninë e Madhe, duke kundërshtuar akuzat për kolonializëm ndaj Izraelit. Një pjesë e rëndësishme e fjalimit iu kushtua Iranit dhe programit të tij bërthamor. Netanyahu kujtoi fjalimin e tij në OKB 14 vjet më parë, kur kishte tërhequr atë që e quajti një “vijë të kuqe” për programin bërthamor iranian. “U betova se do të parandaloja diktaturën vrasëse iraniane nga zhvillimi i bombave atomike. Armë bërthamore që synonin shkatërrimin e Izraelit, armë bërthamore që mund të kërcënonin të gjithë botën”, tha ai. Duke iu referuar sulmeve izraelite ndaj objekteve bërthamore iraniane, Netanyahu tha se vendimi për t’i goditur ato ishte i vështirë, por sipas tij i domosdoshëm. “Shkatërrimi i objekteve bërthamore të Iranit ishte i vështirë. Ishte shumë e vështirë për t’u bërë. Por për mua, ishte një nga vendimet më të lehta që kam pasur ndonjëherë të marr si kryeministër. Sepse nëse nuk do ta kishim bërë, të gjithë do të ishim të vdekur”, deklaroi Netanyahu. Përplasje me Zohran Mamdanin Netanyahu përdori podiumin e OKB-së edhe për të sulmuar kryetarin e Nju Jorkut, Zohran Mamdani, i cili e ka kritikuar ashpër kryeministrin izraelit dhe e ka akuzuar për krime lufte dhe gjenocid ndaj palestinezëve. Duke iu referuar përpjekjeve për ta penguar vizitën e tij, Netanyahu tha: “Ju u përpoqët të më ndaloni të vij këtu. Ju u përpoqët të më mbyllni gojën. Por nuk mund të më mbyllni gojën. Ju nuk mund ta heshtni të vërtetën.” Netanyahu e kritikoi gjithashtu kryetarin e Nju Jorkut duke e cilësuar si “antisemit”, ndërsa sulmoi edhe udhëheqësit e disa vendeve të Evropës Perëndimore, të cilët, sipas tij, i janë “nënshtruar turmës antisemite”. “Për të gjithë ata që përhapin këto gënjeshtra për vendin tim dhe ushtarët tanë të guximshëm, qofshin ulur në këtë sallë apo në zyrën e kryebashkiakut antisemite të Nju Jorkut, unë them: Turp për ju!”, tha Netanyahu. Gjatë fjalimit, Netanyahu shfaqi një pager, duke iu referuar sulmeve ndaj anëtarëve të Hezbollahut në Liban, si dhe një pajisjeje për lidhje satelitore Starlink. Duke iu drejtuar delegacionit iranian, ai tha: “Po ia lë delegacionit iranian që ata të mund ta tregojnë historinë e tyre lirisht në mediat sociale.” Netanyahu shtoi se, sipas tij, është vetëm çështje kohe para se populli iranian të rrëzojë qeverinë në Teheran. Kryeministri izraelit ndodhet në Shtetet e Bashkuara për një vizitë të shkurtër, të lidhur me pjesëmarrjen në Asamblenë e Përgjithshme të OKB-së. Gjatë fjalimit, ai vlerësoi publikisht presidentin amerikan Donald Trump, megjithëse nuk kishte të planifikuar një takim me të gjatë kësaj vizite. “Ne do të vazhdojmë të mbrojmë vendin tonë. Ne do të vazhdojmë të fitojmë sepse nuk kemi zgjidhje tjetër. Në këtë luftë kundër barbarëve, nuk kemi pasur partner më të mirë se Presidenti Trump. E falënderoj për udhëheqjen e tij të guximshme”, tha Netanyahu.