Kuqezinjtë kërkojnë fitore dhe goleadë ndaj San Marinos në “Air Albania”, publikohen formacionet zyrtare

Përfaqësuesja e Shqipërisë zbritet në fushën e stadiumit “Air Albania” për t'u përballur me San Marinon, në një takim ku skuadra e drejtuar nga trajneri Rolando Maran synon jo vetëm tri pikët, por edhe një paraqitje bindëse për të përmirësuar bilancin e golavarazhit. Duke pasur parasysh ecurinë në grup dhe situatën e krijuar, sfidat e fundit ndaj Finlandës dhe Bjellorusisë pritet të jenë përcaktuese, çka e bën të domosdoshëm një triumf sa më të thellë ndaj kundërshtarit modest të grupit, për të mbajtur hapur shanset dhe llogaritë e kualifikimit. Në krahasim me ndeshjen e kaluar në udhëtim ndaj Finlandës, ku kuqezinjtë u mposhtën me rezultatin 2-1 në Helsinki, tekniku Maran ka ndërmarrë vetëm dy ndryshime në formacionin startues. Ndryshimi i parë vjen si detyrim për shkak të pezullimit të Berishës dhe dëmtimit të Sherrit, ku vendin në portë e merr Dajsinani, ndërsa në mesfushë është Shehu ai që zëvendëson Ramadanin. Ndërkohë, vazhdon të aplikohet eksperimenti me dyshen Mitaj-Pilo në krahun e majtë, një zgjedhje kjo që mund të shndërrohet në një opsion të përhershëm për të ardhmen e kombëtares. Kjo përballje e vlefshme për Ligën C të Ligës e Kombeve shënon edhe ndeshjen e fundit për këtë periudhë të angazhimeve ndërkombëtare, para se skuadra të rikthehet sërish në mes të muajit nëntor për dy sfidat e fundit të grupit. Formacionet zyrtare të dy skuadrave për këtë duel janë si vijon: SHQIPËRIA: Dajsinani, Mitaj, Ismajli, Gjimshiti, Hysaj, Pilo, Shehu, Asllani, Hoxha, Muçi, Manaj. Trajner: Rolando Maran SAN MARINO: Kolombo, Xhiokondi, Rosi, Fabri, Çevoli, L. Kapikioni, Zanoni, Meloni, Xhakopeti, Saliçioni, Della Balda. Trajner: Roberto Çevoli