Sveçla pret në takim kreun e KFOR-it: Theksohet rëndësia e partneritetit për sigurinë e vendit

Ministri i Punëve të Brendshme, Xhelal Sveçla, ka zhvilluar një takim pune me komandantin e KFOR-it, gjeneralmajorin Ozkan Ulutas, ku në fokus të bisedës ka qenë avancimi i bashkëpunimit mes autoriteteve të Kosovës dhe trupave paqeruajtëse të NATO-s. Përmes një njoftimi të publikuar në platformën sociale Facebook, ministri Sveçla bëri të ditur se gjatë këtij takimi është bërë një bilanc pozitiv i bashkëpunimit të derisotëm, duke evidentuar sukseset e arritura në kuadër të partneritetit mes institucioneve vendore dhe misionit ushtarak të KFOR-it. Kreu i ministrisë së Punëve të Brendshme ka vënë në pah se bashkëpunimi i ngushtë me gjeneralmajorin Ulutas ka vazhduar në mënyrë të shkëlqyer edhe gjatë mandatit të tij të dytë në krye të KFOR-it në Kosovë. "Sot zhvillova takim me Gjeneralmajor Ozkan Ulutas, me të cilin edhe gjatë mandatit të tij të dytë si Komandant i KFOR-it në Kosovë kemi pasur një bashkëpunim të ngushtë dhe të shkëlqyer", ka shkruar ndër të tjera Sveçla. Sipas tij, dy bashkëbiseduesit ndanë mendimin e përbashkët për sukseset e këtij partneriteti, ndërkaq vunë theksin te domosdoshmëria e intensifikimit dhe fuqizimit të mëtejshëm të sinergjisë ndërinstitucionale, si garanci për ruajtjen e paqes, qetësisë dhe stabilitetit anembanë Republikës së Kosovës. Në përmbyllje të këtij takimi, ministri Sveçla i ka përcjellë një falënderim të sinqertë gjeneralmajorit Ulutaş për angazhimin, vendosmërinë dhe kontributin e dhënë gjatë ushtrimit të detyrës së tij, si dhe për gatishmërinë e treguar në vazhdimësi për t'u koordinuar me institucionet e vendit.