Procesi i integrimit, ministri Hoxha: Shqipëria e gatshme për anëtarësim dhe për të dhënë kontribut në BE

Ministri për Evropën dhe Punët e Jashtme, Ferit Hoxha, ka përshëndetur qëndrimin e shprehur sot nga Komisionerja Marta Kos lidhur me hapat e Bashkimit Evropian për procesin e zgjerimit. Nëpërmjet një postimi në rrjetin social X, kryediplomati shqiptar theksoi përkushtimin e vendit për të ecur përpara me reformat e nevojshme, duke bashkëpunuar ngushtësisht me Komisionin Evropian dhe shtetet anëtare për hartimin e një kalendari të qartë dhe të realizueshëm drejt familjes evropiane. “Shqipëria është gati. Jo vetëm për t’u anëtarësuar në Bashkimin Evropian, por edhe për të ndihmuar në formësimin e së ardhmes së tij”, u shpreh ai. Lidhur me këtë dinamikë, Hoxha vuri në dukje se ky proces kërkon angazhim dhe përgatitje reciproke, si nga ana e shteteve kandidate, ashtu edhe nga vetë struktura e bllokut evropian. “Zgjerimi nuk ka të bëjë vetëm me gatishmërinë e vendeve kandidate për t’u anëtarësuar. Ai ka të bëjë po aq edhe me gatishmërinë e Bashkimit Evropian për t’i mirëpritur ato”, deklaroi ministri. Ai e cilësoi integrimin evropian si një mision strategjik të përbashkët që ndikon drejtpërdrejt në konsolidimin e demokracisë dhe ngritjen e standardeve të jetesës për qytetarët e Shqipërisë, duke sjellë njëherësh vlerë të shtuar për sigurinë, konkurrencën dhe qëndrueshmërinë e mbarë kontinentit. Në këtë optikë, ministri ritheksoi vendosmërinë për të çuar përpara reformat dhe për të mbështetur një integrim gradual përmes nismave konkrete dhe efektive. Duke e konsideruar zgjerimin si një shtyllë jetësore të së kaluarës dhe të ardhmes evropiane, Hoxha përmbylli se ky angazhim e shndërron Evropën në një entitet më të bashkuar dhe më rezistent. “Për një Evropë më të fortë në shtëpi. Një Evropë më të fortë në botë”, përfundoi reagimin e tij ministri Hoxha.