Dënimet në Zvicër: Dy kushërinj nga Shqipëria dhe një grua nga Kosova shpallen fajtorë për drogë dhe pastrim parash

Gjykata Penale në Lucern ka dhënë vendimet përfundimtare për dy shtetas shqiptarë dhe një grua nga Kosova, të cilët akuzoheshin për shpërndarje lëndësh narkotike dhe shplarje parash. Pasi të pandohurve u pranuan fajësinë dhe pranuan dënimet e kërkuara nga organi i akuzës, çështja u shqyrtua përmes procedurës së shpejtë, duke e bërë vendimin të formës së prerë. Sipas dokumenteve të siguruara nga aktakuza, aktiviteti kriminal i të rinjve shtrihej në periudha të ndryshme kohore. Kushëriri 26-vjeçar kishte shitur afro tre kilogramë kokainë brenda një harku kohor prej një viti e katër muajsh, nisur nga dhjetori i vitit 2022, ndërsa kishte operuar sërish në këtë fushë për rreth tre muaj gjatë vitit 2025. Në një fazë tjetër, ai ia kishte besuar këtë rrjet të paligjshëm kushëririt të tij 22-vjeçar, i cili kishte tregtuar rreth dy kilogramë heroinë. Hetuesit i kanë renditur të dy të afërmit në shkallët më të ulëta të strukturës së grupit kriminal. Pjesë kyçe e hetimeve ka qenë edhe një agjenci udhëtimesh po në qytetin e Lucernit. Hetuesit zbuluan se 26-vjeçari e kishte frekuentuar këtë biznes më shumë se njëqind herë dhe, në të paktën gjashtëdhjetë raste, kishte dorëzuar shuma monetare që dyshohet se vinin nga shitja e substancave narkotike. Përmes kësaj skeme, autoritetet llogarisin se janë pastruar mbi 300 mijë franga zvicerane, ndërsa te 22-vjeçari shuma e lidhur me krimet kap shifrën e rreth 130 mijë frangave. Duke marrë parasysh bashkëpunimin dhe pranimin e fajësisë, gjykata e dënoi 26-vjeçarin me tre vjet heqje lirie, nga të cilat 18 muaj do t'i vuajë efektivisht, kurse pjesa tjetër mbetet me kusht. Për kushëririn e tij 22-vjeçar u caktua po ashtu një dënim prej tri vitesh burgim, ku vetëm nëntë muaj do të jenë të pakushtëzuara. Krahas dënimeve me burg, të dy kushërinjve u është caktuar masa e dëbimit nga Zvicra, duke iu ndaluar hyrja në këtë shtet për një periudhë prej dhjetë vjetësh. Në të njëjtën seancë gjyqësore është dhënë vendimi edhe për 31-vjeçaren nga Kosova, e cila u shpall fajtore për ndihmë në aktivitetin e paligjshëm. Ajo u dënua me dhjetë muaj burgim me kusht, pasi akuzohej se kishte siguruar strehim dhe kishte mbledhur qiratë, ndërkohë që ishte në dijeni të plotë se pronat përdoreshin për veprimtari kriminale lidhur me narkotikët. Ndryshe nga dy bashkëpunëtorët e saj meshkuj, ndaj gruas 31-vjeçare nuk është marrë masë dëbimi nga territori zviceran. Trupi gjykues e mori këtë vendim duke vlerësuar faktin se ajo ka lindur në Zvicër dhe gëzon lidhje të ngushta shoqërore e familjare me këtë vend.